GMN TV Politika PR Lú Olo fiar OJE 2020 sei pasa iha PN

PR Lú Olo fiar OJE 2020 sei pasa iha PN

1 views

Prezidente Repúblika (PR), Francisco Guterres Lú Olo,  fiar katak, Orsamentu Jeral Estadu (OJE) 2020, pasa iha Parlamentu Nasionál (PN) tanba povu Timor-Leste (TL), presiza osan.

“Ha’u iha espetativa katak orsamentu  ne’e sei bele liu, no ha’u fiar katak deputadu sira ohin (horseik-red), hahú fila fali sira nia kna’ar, sira iha konsensia katak, povu ida ne’e presiza osan, para bele implementa programa sira ne’ebé Governu iha, para bele hadia povu nia moris”, dehan, Xefi Estadu Francisco Guterres Lú Olo, iha PN, Tersa (15/09/2020).

Xefi Estadu subliña liu tan, presiza mós osan hodi selu empreza hirak ne’ebé seidauk selu até agora, atu nune’e roda ekonomia empreza nian bele la’o nafatin.

“Presiza iha osan para atu selu empreza hirak ne’ebé, ba kotuk ne’e la selu até agora, pelemenus iha osan atu roda ekonomia bele la’o nafatin, tamba ne’e ha’u fiar senor deputadu sira,” afirma, Prezidente Repúblika Francisco Guterres Lú Olo.

Entretantu tetu OJE tinan 2020, Governu aprova ho montante billiaun USD1.4 no tetu OJE provizoriu ba tinan 2021 ho montante billiaun USD1.6.

Fó VIII Governu kontinua ukun la viola K-RDTL

Prezidente Repúblika (PR), Fransisco Guterres Lú Olo, hatete desizaun hodi kontinua fó oportunidade ba VIII Governu atu kontinua ukun “dalan ne’e la viola Konstituisaun RDTL”.

Prezidente Repúblika konsidera desizaun, Primeiru Ministru, Taur Matan Ruak, ne’ebé dada fali nia pedidu demisaun tamba konsiénte ba nia sentidu misaun no konxiénsia ba ninia dever. Tanba   Timor-Leste presiza  garante duni estabilidade Nasaun ninian.

Lú Olo salienta katak desizaun ne’ebé nia foti hodi fo fiar ba oitavu Governu atu kontinua ukun tamba tuir nia laiha ona dalan seluk ne’ebé di’ak liu ida ne’e. Xefi Estadu hatete Timor-Leste presiza dunik Governu ida atu jere konsekuénsia aat hosi COVID-19.

“Tanba VIII Governu Konstitusionál hala’o hela ninia knaar tuir Konstituisaun Repúblika haruka, no ita presiza asegura governasaun ida ne’ebé efetivu, liuliu tanba ita hasoru mós pandemia COVID-19, Prezidente Repúblika hili  fó dalan ba VIII Governu Konstitusionál no Primeiru-Ministru atu hatutan nafatin sira-nia knaar. Dalan  ne’e la viola Konstituisaun RDTL. Haree ba sirkunstánsia hotu-hotu, desizaun polítika ida-ne’e, tama iha kompeténsia sira-ne'ebé artigu 74 Konstituisaun Repúblika fó ba Prezidente Repúblika. Faktu ida ne’ebé akontese duni mak  maioria parlamentár foun ida ne’ebé, entretantu harii ho partidu PLP, KHUNTO no FRETILIN,  bele ona garante kontinuidade no fó lejitimidade ba VIII Governu. Prezidente Repúblika hein katak VIII Governu Konstitusionál sei metin nafatin to’o nia mandatu remata iha tinan 2023”, hatete Prezidente Repúblika iha nia diskursu ba sesaun solene abertura ba PN Terseira Lejislatura ba  Kinta Lejislatura, Tersa (15-09-2020).

Xefi Estadu ne’e salienta desizaun ne’ebé fo sai ba partido politiku sira iha asentu parlamentár hodi  ko’alia ba malu hodi tane Governu.Tuir Presidente Repúblika nasaun ninia situasaun sosiál no ekonómika ezije solusaun, ho maioria ida ne'ebé mosu no estável, ida ne’e fó dalan ba buat ne'ebé Xefie Estadu sempre defende katak Governu ida ne’e tenke kaer mandatu to’o rohan. Antes ne’e Primeiru Ministru, Taur Matan Ruak, apresenta ona nia pedido demisaun iha loron 24 fulan fevereiro tinan ne’e.

Parlamentu Nasionál mak fó lejitimidade no sustentabilidade ba Governu ne’ebé de’it. Maioria parlamentar ne’ebé tanen Governu bele harii tuir rezultadu eleisaun no bele mós mosu, iha momentu ne’ebé de’it, durante períodu Lejizlatura. Xefi Estadu salienta Governu sei iha hela oportunidade atu hatama proposta Orsamentu Jerál Estadu 2020 ba Parlamentu Nasionál, hodi troka rejime duodésimu ne’ebé la’o daudaun.

“Iha fulan-Dezembru 2019, Primeiru-Ministru dada-sai fali proposta Orsamentu Jerál Estadu ba 2020 ne’ebé hatama tiha ona ba  debate iha Parlamentu Nasional, no  iha fulan-Janeiru tinan 2020 hatama fali proposta foun ida. Dada fali proposta dahuluk no proposta daruak Orsamentu Jerál Estadu  la pasa,  iha 17 Janeiru 2020, la implika katak Konstituisaun Repúblika fó ona dalan atu demite Governu ka disolve Parlamentu Nasionál, maski lala’ok polítiku rua  ne'e relevante tebes. Tanba proposta Orsamentu Jerál Estadu la pasa, mosu hanoin ne’ebé konsidera katak rejeisaun ne’e bele ona lori Prezidente Repúblika atu  disolve Parlamentu Nasionál”.

PR Lú Olo esplika bainhira maioria parlamentár ida muda, ida ne’e la determina katak Governu tenke  monu ka tenke  harii kedas Governu foun ida. La determina ida-ne’e tanba prosesu hamonu Governu tenke la’o tuir rekizitu no sirkunstánsia tama iha artigu 112, hosi Konstituisaun Repúblika. Artigu ne’e hatete katak Governu monu bainhira Parlamentu Nasionál la aprova votu konfiansa ka bainhira aprova mosaun sensura. Tuir Xefi Estadu dispozisaun konstitusionál ida-ne'e fó protesaun ba Governu nia autonomia polítika relativa tanba define loloos kauza no oinsá bele demite Governu. Hafoin haree katak buat ruma akontese iha kontestu  ida ne’e, Prezidente Repúblika bele foti desizaun relasiona ho demisaun Governu tuir pontu  n.° 2 hosi artigu 112

“Ha’u hakarak haklaken  katak faktu ne'e de’it la obriga Prezidente Repúblika  atu disolve Parlamentu Nasionál.  Ita haree momoos katak faktu ida-ne'e la hamosu krize institusionál grave tanba VIII Governu hala’o nafatin ninia knaar hanesan baibain. Aleinde ne'e, Konstituisaun fó dalan ba Governu  atu hatama fali proposta lei Orsamentu Jerál Estadu foun ida durante sesaun lejizlativa hanesan, biar proposta ida uluk la pasa. Importante fó-hanoin mós katak Parlamentu Nasionál hala’o nafatin ninia knaar baibain tuir  Konstitusaun”.

PR salienta ema hotu tenki konsiente katak, hafoin Governu ida harii, tuir Konstituisaun RDTL haruka, nia iha autonomia polítika hodi hala’o ninia knaar, nu’udar Órgaun Ezekutivu. Cin/Oct


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker