Parlamentu Nasionál (PN) liu husi opozisaun bankada CNRT, propoin Governu atu halakon ona medida Konfinamentu Domisiliáriu Jerál (KDJ) no Serka Sanitária (SS).
Fundamentu husi bankada opozisaun nian katak, povu barak moris ho frustradu, tanba balu lakon servisu, la hetan rendimentu, iha tempu COVID-19.
Razaun seluk mak, pozitivu COVID-19, iha semana ikus ne’e nia númeru tun, kompara ho semana sira liu-ba. Bankada opozisaun ne’e prefere atu Governu rigor iha fronteira.
“Tanba moras ne’e grave, bele estende, maibe estende mak estadu emerjénsia, la’os atu aplika fali KO ka SS, implementasaun lockdown ida total ne’e di’ak liu ita evita ona. Labele iha para fó oportunidade ba povu halo sirkulasaun hodi buka sira nia moris, duke nune’e hela de’it, entaun ita rasik haree, dalan ne’e ita taka ba ita nia populasaun sira, maibé polítiku sira la’o livre fali” dehan deputadu CNRT, Domingos de Carvalho, iha PN, Segunda (06/09).
Iha sorin seluk, xefe bankada FRETILIN, Francisco Miranda Branco sujere Governu, atu tetu didi’ak situasaun ne’e, molok prolonga KDJ ho SS.
“Se haree ba situasaun agora kazu pozitivu tun, hau hanoin Governu mós bele haree didi’ak, hodi estuda ida ne’e” tenik bankada apoia Governu.
Medida KDJ ne’ebé Governu aplika iha Munisípiu Díli ne’e, sei termina iha loron 9 fulan Setembru ne’e. No Ministra Saúde (MS) Odete Maria Freitas Belo mós propoin ona atu Governu estende KDJ ba semana rua tan.
Atualizasaun dadus COVID-19 husi SIJK ba loron 6, fulan Setembru ne’e hatudu, kazu konfirmadu pozitivu foun 80, kazu rekuperadu 130, kazu ativu 4.132, kazu komulativu 17.698 no kazu óbitu foun 2, nune’e kazu óbitu iha TL sa’e ba 82.Say
