Governu liu husi Ministériu Transporte no Komunikasaun (MTK), Sesta (10/09), sei reativa hikas sirkulasaun transporte públiku hanesan Mikrolete, Taxi, Anguna, Bus ne’ebé sirkula iha Díli no ba Munisípiu.
MTK nia desizaun ne’e, bazeia ba reuniaun Konsellu Ministru nian, ne’ebé hakotu ona medida Konfinamentu Obrigatóriu Jerál (KOJ) iha Díli, no reativa atividade merkadu, loja, restaurante no seluk tan.
“Hakarak apela ba públiku kona-ba reativasaun transporte terreste nian, portantu hahú aban dia 10 de Setembru 2021, Ministériu Transporte no Komunikasaun reativa fali transporte públiku sira ne’ebé bele sirkula livremente iha Díli laran, nomós husi Díli ba Munisípiu no Munisípiu mai Díli” informa Diretór Jerál MTK, Gaspar de Araújo, liu husi konferénsia imprensa, Kinta (09/09), iha MTK, Merkadu Lama Díli.
No apela nafatin ba motorista sira tenke lori kartaun vasina kontra COVID-19 kompleta, uza máskra, distánsia sosiál, tenke iha karta kondisaun, dokumentu lisensa ne’ebé válidu. Ba pasazeiru tenke uza bebeik hand sanitizer atu hamos lima bebeik.
Husu mós ba autoridade PNTL nafatin hala’o passa revista ba transporte públiku hotu, atu hatene kona-ba sira nia dokumentu ne’ebé válidu no inválidu.Eca
