Akadémiku Timor-oan, Adolmando Amaral, husu Primeiru Ministru (PM) Taur Matan Ruak, atu rezigna-an hosi mandatu, tanba laiha konsisténsia ba deklarasaun ne’ebé Xefe Governu rasik deklara, sidadaun ne’ebé vasina dala rua bele la’o lívre.
“Iha situasaun hanesan ne’e PM tenke rezigna-an ona, tanba laiha komitmentu ba deklarasaun ne’ebé antes dehan sidadaun ne’ebé vasina dala rua bele la’o lívre, maibé iha Konfinamentu Obrigatóriu (KO) sidadaun vasina dala-rua kontinua sulan iha uma,” Adolmando Amaral, ba GMN, Kuarta (01/09) iha nia knaar fatin, Aimeti-Laran, Díli.
Nia kompara, antes ne’e membru Governu balu koalia sala deit, maibé la’os promesa, PM foti desizaun hodi ezonera kedas. Maibé Xefe Governu mak promesa falsu, ne’e laiha buat ida.
“Ema seluk koalia sala Primeiru Ministru bele ezonera, oinsá Primeiru Ministru koalia sala, nia rasik labele rezigna-an, entaun hanesan líder tenke komitmentu ba deklarasaun,”nia lamenta.
Governu tenke iha ona opsaun seluk husi Serka Sanitária (SS) no Konfinamentu Domisiliáriu Jerál (KDJ), nune’e labele haterus liu povu, iha situasaun pandemia COVID-19.
Tanba medida rua SS no KDJ ne’e laiha efeitu pozitivu ba mitigasaun surtu COVID-19, tanba kada loron númeru pozitivu sempre aumenta.
“Agora dadaun Governu demostra hela sira nia inkapasidade ba povu ida ne’e, tanba tinan barak ona Governu laiha inovasaun ba forma oinsá prevene COVID-19,” hatete Adolmando.
Atualizasaun dadus COVID-19 husi Sentru Integradu Jestaun Krize (SIJK), ba loron 01, fulan Setembru, rejista tan kazu pozitivu konfirmadu foun hamutuk 232, kazu rekuperadu 247, kazu ativu 4.480, kazu komulativu konfirmadu hamutuk 16.914, no kazu óbitu 72.
Olinda Guterres: ‘Povu la fiar ita’
Nune’e mós Parlamentu Nasionál (PN) kestiona desizaun Governu nian la tuir promesa sira ne’ebé hato’o ona ba povu katak, sidadaun ne’ebé mak vasina kompleta sei la’o lívre iha territóriu nasionál.
Deputada Bankada KHUNTO, Olinda Guterres hatete, realidade ne’ebé akontese, la tuir ona promesa Governu nian, hodi limite nafatin sidadaun ne’ebé vasina dala-rua la la’o lívre.
“Primeiru Ministru no membru Governu, la koopera hamutuk, ida ne’e mak halo povu sira rungu-ranga, agora povu atu fiar ida ne’ebé? Vasina dala rua la’o livre mak sira hili ka ou sira la vasina. Primeiru Ministru rasik koalia katak, vasina dala rua bele ba mai, maibé iha fali Ministériu Saúde ho membru Governu sira dehan fali vasina dala rua labele la’o lívre, ne’e halo konfuzaun povu” lamenta Deputada Olinda Guterres, iha PN Kuarta (01/09).
Nia konsidera, desizaun sira ne’ebé la hanesan, sei hamihis konfiansa povu nian ba Governu, kona-ba luta hasoru pandemia coronavirus iha territóriu nasionál.
“Agora dadauk ne’e povu la fiar ita, povu la fiar ita oinsá? Ema mate iha liur dehan COVID, tama ona iha ospitál, tenke ba Vera Cruz, ba ne’e la’os atu moris, maibé ba ne’e atu mate nian” dehan nia.
Deputada ne’e mós propoin Governu, bainhira aplika medida Serka Sanitária (SS) no Konfinamentu Domisiliáriu Jerál (KDJ), tenke tetu uluk kondisaun ekonomia povu nian.
“Agora aumenta tan, la’os iha Díli deit, maibé fatin-fatin, Governu tenke haree, sira hamlaha” hakotu Olinda.
Antes ne’e, Xefe Governu Taur Matan Ruak promete ona katak, sidadaun ne’ebé vasina kompletu sei la’o lívre, no bainhira vasina atinze ona porsentu 70, Governu sei aplika nova normalidade.Fel/Eca
