Prezidente Repúblika (PR), Francisco Guterres Lú Olo, veta diploma Governu nian kona-ba apoiu finanseiru ba ema ne’ebé mate ka hetan inkapasidade, hafoin simu vasina kontra COVID-19.
Xefe Estadu veta diploma ne’e, to’o ohin loron Timor-Leste (TL) seidauk iha lejislasaun ne’ebé regula responsabilidade sivíl kontratuál Estadu nia, ka entidade públika sira nia ba ezersísiu atividade jestaun públika.
Bainhira konsidera katak, lei ka dekretu-lei ruma la tuir konstituisaun RDTL, PR haruka ba Tribunál Rekursu (TR), no instánsia ida ne’e mak deside inkonstitusionál ka lae.
Maibe Xefe Estadu la hili dalan haruka dekretu-lei ne’e ba TR, tanba haree katak, matéria ne’e monu ba iha ámbitu responsabilidade sivíl estrakontratuál estadu nia, ne’ebé tenke hatuur ho lei ida.
Francisco Guterres Lú Olo hatete, tuir lei inan K-RDTL katak, Parlamentu Nasionál mak iha knar lejislativu ba matéria ida ne’e, no bele mós fó autorizasaun lejislativa ba Governu atu prepara lei kona-ba responsabilidade sivíl Estadu nian.
“Biar inisiativa di’ak ida, Governu la halo ho autorizasaun lejislativa Parlamentu Nasional, tanba ne’e mak Prezidente Repúblika veta dekretu-lei ne’e” sita iha komunikadu ne’ebé JNDIÁRIO asesa husi gabinete média palásiu prezidensiál Sesta (02/09).
Maske Francisco Guterres Lu Ólo veta diploma ne’e, maibé xefe Estadu rasik konkonrda ho diploma ne’e, no husu Governu halo uluk lejislasaun ne’ebé regula responsabilidade sivíl kontratuál Estadu nian, hafoin submete ba Prezidente Republika atu halo fali apresiasaun.
Nune’e Xefe Estadu iha esperasan katak, tempu badak Parlamentu Nasionál mak haruka diploma ne’e ka fó autorizasaun lejislativa ba Governu, hodi hato’o proposta-lei atu regula responsabilidade sivíl Estadu nia.Dms
