GMN TV Politika PR-PM ho Xanana hato’o sentida kondolénsia ba família enlutada Jorge Sampaio

PR-PM ho Xanana hato’o sentida kondolénsia ba família enlutada Jorge Sampaio

110 views

Prezidente Repúblika (PR), Francisco Guterres Lú Olo, Primeiru Mínistru (PM), Taur Matan Ruak, ho antigu líder rezisténsia ba libertasaun Timor-Leste, Kay Rala Xanana Gusmão, hato’o sentida kondolénsia profunda ba família enlutada, eis Prezidente Repúblika, Portugal, Jorge Sampaio, ne’ebé hakotu ona pregrinasaun moris mundu, iha Sesta, loron 10, fulan Setembru, 2021.

Kay Rala Xanana Gusmão hato’o kondolénsia ba eis Prezidente Portugal, Jorge Sampaio, ne’e liu husi karta ofisiál tanba Jorge Sampaio hanesan amigu di’ak ne’ebé fó kontribuisaun ba prosesu luta libetasaun Timor-Leste (TL) nian.

Karta ne’e hakerek rasik husi líder karismátiku, Kay Rala Xanana Gusmão, no entrega direta husi Sekretariadu Apoiu Maun Bo’ot Xanana, Tomas Cabral ba Embaixadór Portugal iha TL, Jose Pedro Machado Viera.

Iha karta ne’e, eis komandante em xefe, Xanana Gusmão, hato’o sentida kondolénsia ba oan, família, no amigu husi eis prezidente Jorge Sampaio.

Iha karta ne’e mos, Xanana espresa nia sentimentu kona ba memoria ne’ebé iha liu-liu haree ba Timor-Leste nia moris.

“Maun Bo’ot haruka hela karta ida mai entrega ba embaixada atu haruka liu ba em termos embaixadór, no Maun Bo’ot hato’o hela nia sentidu kondolénsia profunda liu-liu ba ita-nia belun di’ak, depois nia mai kedas vizita Timor-Leste. Maun Bo’ot hato’o sentidu kondolénsia ba família, amigu, ba povu iha Portugal, ne’e mak ami aprezenta Maun bo’ot Xanana nia karta ne’e atu hato’o ba Portugal,” dehan Responsavel Sekretariadu Apoiu Maun Bo’ot Xanana Gusmão, Tomas Cabral ba GMN, Domingu (12/09), iha Colmera, Díli, hafoin entrega karta ne’e ba Embaxiadór Portugal, José Pedro Machado Viera.

Iha fatin hanesan Embaxiadór Portugal, José Pedro Machado Viera, hato’o nia agradesimentu ba hotu-hotu nia kondolénsia, liu-liu líder karismátiku Kay Rala Xanana Gusmão.

PR Francisco Guterres Lú Olo

Nune’e mos, Prezidente Repúblika (PR), Francisco Guterres Lú Olo, konsidera, saudozu Jorge Fernando Branco de Sampaio, nu’udar ‘Amigu Boot’ no ‘Kompañeru Luta’ Timor-Leste (TL) nian.

Liu hosi komunikadu ne’ebé JNDIÁRIO asesa iha Gabinete Média Palásiu Prezidensiál, Jorge Sampaio, nu’udar kompañeru luta nian ne’ebé hamutuk ho TL iha momentu sira difísil nia laran.

Lú Olo konta, eis Prezidente Repúblika Portugal ne’e, 1999 hafoin referendu ne’ebé nakonu ho violénsia, Jorge Sampaio sai fulan insónia no serbisu makaas liután, iha kalan no loron atu hases tragédia ba Timor-oan sira. “Kauza Timor nian halo Sampaio tanis,” sita iha komunikadu PR nian.

Timor-Leste lakon nia amigu ida no kompañeru luta ida iha momento desizivu ba vida ami-nia País. Ema ida estraordináriu ne’ebé kombina intelijénsia ka matenek ho fuan, ema ida nakonu ho aksaun.

Jorge Sampaio nu’udar ezemplu polítiku ida ne’ebé hala’o nia knaar ho seriedade no koerénsia. Nia sempre sai hun ida ba inspirasaun ba ema hotu ne’ebé hakarak serve tan kauza públika ida.

Xefe Estadu Francisco Guterres Lú Olo afirma, eis prezidente Portugal ne’e nu’udar figura “markante no inkontornável” istória Portugal, lutador kolen-laek ba liberdade no ba demokrasia.

Estadista ida integru no umanu, iha kauza hotu-hotu ne’ebé nia hola parte hatudu “nia néon boot luta ba justisa, ba dame, ba liberdade no ba diálogu entre sivilizasoins” dehan Lú Olo.

Bainhira Timor-oan na’in-rua simu Prémiu Nobel da Paz,  iha Dezembru 1996, Jorge Sampaio asiste serimónia atribuisaun prémiu iha Oslo, Noruega.

“Iha tempu ne’ebé nia hatene katak Indonézia fó sinais sei muda nia pozisaun iha relasaun ho Timor-Leste, Jorge Sampaio, nu’udar Xefe Estadu, hametin kedas nia atividade ba kauza Timor-Leste, hatudu dala ida tan nia koñesimentu klean kontestu internasionál no nia vizaun estratéjika,” hatete.

TL haksolok orgullu ho prezensa Jorge Sampaio nian iha Díli, asiste isar Bandeira no rekoñesimentu internasionál ba Estadu TL, iha 20 Maiu, 2002.

Parlamentu Nasionál mós atribui títulu ‘Cidadão Honorário da República Democrática de Timor-Leste’ ba Jorge Sampaio iha nia vizita ikus mai Timor-Leste iha 2006.

“Ema boot sira hanesan nia nunka mate tanba nia legadu sira sei hela metin husi jerasaun ba jerasaun,” tenik.

Prezidente Repúblika hakerek karta ba ninia omologu Prezidente Repúblika Portugéza Marcelo Rebelo de Sousa, hodi hato’o sentidu kondolénsia profunda ba família enlutada no portugeza ne’ebé lakon Jorge Sampaio.

Saudozu Eis-PR Portugeza, Jorge Fernando Branco de Sampaio (81), hakotu is iha Sesta, loron 10, fulan Setembru tinan ne’e, tanba sofre moras respiratóriu.

PM Taur Matan Ruak

Primeiru Mínistru (PM), Taur Matan Ruak, hato’o sentida kondolénsia profunda ba eis Prezidente Repúblika Portugeza, Jorge Fernando Branco de Sampaio.

“Lori VIII Governu konstitusionál nia naran, ha’u-nia naran rasik no ha’u-nia kaben nia naran, ami hato’o kondolénsia kle’an ba família, kolega no belun sira husi saudozu eis-Prezidente Repúblika Portugeza, Dr. Jorge Fernando Branco de Sampaio, ne’ebé derrepente de’it fila hikas ona ba ita-nia aman Maromak nia kadunan santu,” hato’o Xefe Governu ne’e, liu husi kominikadu ne’ebé JNDIÁRIO asesa, husi gabinete média Primeiru Ministru, Sábadu (11/09).

Governu rekoñese saudozu mós tama iha istória luta libertasaun pátria Timor-Leste (TL) nian, tanba durante nia mandatu iha tinan 1996, to’o 2006, mak hamosu akordu 5 de Maiu 1999.

“Dr. Jorge Sampaio tama iha istória hanesan Prezidente ne’ebé kontribui tebes ba Restaurasaun Independénsia Nasionál. Nia rasik sai hanesan testemuña, nu’udar konvidadu de onra iha serimónia ne’ebé hala’o iha loron 20 fulan-Maiu, tinan 2002, iha Dili, Timor-Leste. Eis-Prezidente Jorge Sampaio ne’e sei lembra iha mundu hanesan figura importante liu ba kauza sira no ba liberdade, no sei rekoñese nu’udar Timor-Leste no Timor-oan sira nia Belun Boot ida,” tenik iha komunikadu.

Eis Prezidente RDTL, mós ekoraza nafatin ba saudozu nia espoza Maria José Rodrigues Ritta, ho nia família tomak, belun sira hotu, ne’ebé saudozu husik hela iha mundu ne’e.

“Liafuan laiha atu hato’o iha tempu susar no tristeza, bainhira lakon Belun Doben ida. Ita nia pensamentu no orasaun sei hamutuk ho Vosa Exelénsia, Belun doben, Dra. Maria José Rodrigues Ritta, ho Ita-boot-nia família, kolega no belun sira hotu, atu bele iha forsa no fiar nafatin hodi hakat liu momentu difisil ida ne’e” hakotu.

Saudozu Eis-PR Portugeza, Jorge Fernando Branco de Sampaio (81), hakotu is iha Sesta, loron 10, fulan Setembru tinan ne’e, tanba sofre moras respiratóriu.Nes/Ags


Banner

Foto

Notisia Ikus

Governu adia aprovasaun ba realojamentu vítima DN

September 27, 2021
Governu liu husi reuniaun Konsellu Ministru (KM)...

PM Taur: TL lakon fundadór ida

September 27, 2021
Primeiru Ministru (PM), Taur Matan Ruak, hamutuk...

Alkatiri: Ma’huno sai luta povu tomak nian

September 27, 2021
Sekretáriu Jerál Partidu FRETILIN, Marí Alkat...

Komisaun F bolu urjente MS Odete

September 26, 2021
Komisaun F Parlamentu Nasionál trata asuntu Sa...

Xanana: Ha’u ho Ma’huno mak reorganiza rezisténsia armada

September 26, 2021
Eis komandante Em Xefe FALINTIL, Kay Rala Xanana...
1 2 3 644

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker