GMN TV Politika Xanana: Ha’u ho Ma’huno mak reorganiza rezisténsia armada

Xanana: Ha’u ho Ma’huno mak reorganiza rezisténsia armada

1,421 views

Eis komandante Em Xefe FALINTIL, Kay Rala Xanana Gusmão, hato’o mensajen pezár no sentida kondolénsia ba família Ma’huno Bulerek Karathayano, ne’ebé Sesta (24/9), hakotu iis iha Ospitál Nasionál Guido Valadares (HNGV) Díli.

Sorevivente husi Komité Sentral FRETILIN (CCF-sígla portugés), Kay Rala Xanana Gusmão, hatete, nia (Xanana) ho Ma’huno mak hamutuk reorganiza fali rezisténsia armada iha tinan 1981.

“Ohin ha’u lakon tan ha’u-nia alin ida Ma’huno Bulerek Karathayano, hamutuk ho ha’u maka sobrevivente husi Comite Central FRETILIN husi kedas tinan 1980, ne’ebé reorganiza fali rezisténsia armada iha primeira konferénsia nasionál ne’ebé hala’o iha fulan marsu, tinan 1981 iha Lalini,” hatete Xanana Gusmão, (24/09), iha Oecusse.

Nia konta, iha ona konferénsia nasionál iha Lalini ne’e mak Xanana Gusmão ho Ma’huno Bulerek Karathayano deside hili fali membru CCF foun hanesan Nino Konis Santana, Bere Malai Laka no selu tan ne’ebé mate iha funu lara,

“Iha ona konferénsia ne’e mak ami nain rua orienta kuadru sira ne’ebe partisipa iha ne’eba hodi eleje fali membru CCF foun hanesan Nino Konis Santana, Bere Malai Laka no seluk-seluk tan ne’ebé mate iha funu laran no balu iha kedas Setembru, tinan 1981 iha operasi kikis ne’ebé inimigu hala’o iha rejiaun sentrál” nia haktuir.

No Lere Anan Timur mós eleitu hanesan membru CCF, no sai komisáriu polítiku iha rejiaun Haksolok froenteira Sul, iha ona tinan 1984 mak sai husi kuadru polítiku no asume kargu hanesan komandante.

“Husi jerasaun 1981 mak hela deit ona komandante Lere. Husi fali jerasaun CCF 1975 ne’ebé la rende no sei moris mak ami nain rua Ma’huno ha’u (Xanana), ne’ebé ohin Ma’huno liu tiha ona,” konta Eis Guerileiru ne’e.

Lider rejisténsia ne’e dehan tan, iha tinan 1999 Ma’huno hetan tiha stroke ho terus ho moras ida ne’e no ohin nia husik tiha ita. Xanana Gusmão mós hato’o sentidu kondolénsia profundu ba família enlutada.

“Nu’udar Prezidente Partidu CNRT hodi partidu tomak, kuadru ho militante sira nia naran, ha’u hakarak presta ami no onra ba fundadór ida partidu CNRT nian. nu’udar Prezidente Partidu CNRT, nu’udar mos pesoál ha’u hato’o sentidu pézames ba kompañeira Terezinha Viegas, ho família tomak husi kompañeiru Ma’huno Bulerek Karathayano,” hakotu Xanana Gusmão.

Biografia Saudozu Ma’huno Bulerek Karathayano

Timor-Leste lakon tan ninia eroi bo’ot ida (mate) eis komandante em xefe FALINTIL, saudozu José António Gomes da Costa ho naran revolusionáriu Ma’huno Bulerek Karathayano, Sesta (24/9) iha tuku 17 liu OTL, iha Ospitál Nasionál Guido Valadares (HNGV-sigla portugés), Díli, hafoin hala’o tratamentu ba nia saúde.

Antes ne’e, saudozu Ma’huno Bulerek  halo tratamentu iha Izolamentu Lahane, tanba kona moras COVID-19. Maibé iha teste ba dala-ikus, hatudu rezultadu saudozu negativu husi COVID-19 no ekipa médiku transfere fali ba HNGV hodi halo tratamentu  moras sira seluk. maske nune’e esfosu médiku nian la konsege salva saudozu hodi hakotu iis.

Hafoin saudozu hakotu iis, família sira transporta ona mate-isin saudozu nian hosi HNGV mai iha nia rezidénsia Praia dos Coqueiros, Díli, hodi hala’o prosesu fúnebre tuir kultura no hein Estadu nia desizaun ba saudozu rasik.

Saudozu Ma’huno Bulerek Karathayano, orijem husi Munisípiu Manatutu, moris iha loron 14 Abríl, tina 1949, nu’udar Komandante FALINTIL ne’ebé hamutuk ho komandante FALINTIL sira seluk, hanesan Komandante Em Xefe FALINTIL, Kay Rala Xanana Gusmão, ne’ebé dedika sira-nia moris tomak oinsa luta kontra okupasaun inimigu hahú kedas husi tinan tinan 1975 to’o 1999.

Funu na’in Ma’huno Bulerek Karathayano, hafoin desmobolizadu iha tinan 2013 deside-an tama kedas partidu Congresso Nacional Recostrução Timorense (CNRT) ne’ebé lidera husi Kay Rala Xanana Gusmão, nu’udar mos eis komandante em xefe FALINTIL.

Iha nia jornada luta ne’ebé naruk tama iha tinan 1987, Ma’Huno Bulerek nomeadu hanesan Sekretáriu Komité Ezekutivu FRETILIN hafoin Kay Rala Xanana Gusmão haketak tiha FALINTIL husi FRETILIN nune’e harii Kongresu Nasionál Rejisténsia Maubere (CNRM-sígla portugés) iha tinan 1988.

Tama ba iha fulan Maiu, tinan 1990, Ma’huno Bulerek Karathayano sai hanesan Sekretáriu Jerál FRETILIN. Hafoin Kay Rala Xanana Gusmão kapturadu husi inimigu Indonéziu iha November 1992, Ma’huno asume kedas responsabilidade hanesan Komandante FALINTIL to’o loron 05, fulan Abríl, tinan 1993.

Hafoin Ma’huno inimigu kaptura iha Díli, nune’e Nino Konis Santana komanda hikas FALINTIL iha tinan 1993.

Ma’huno durante iha komarka-laran fulan 18 hetan torturasaun husi inimigu (tropa Indonéziu) to’o nia hetan liberdade iha tinan 1995 tanba amnistia. Iha tinan 2017, Ma’huno asume kargu nu’udar Vise Prezidente partidu  CNRT.Nes/GMN


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker