Asosiasaun Profisional Edukasaun Militante FRETILIN, dadaun hala’o sosializasaun ba militante no simpatizante FRETILIN nian hodi prepara hasoru kualker situasaun ne’ebe mak akontese.
“Ami haree tok programa saida mak ami prepara, para ami hein orientasaun husi partidu, keta atu fó servisu ruma, tanba ita hotu hatene katak, públiku mós hatene ona liafuan ida eleisaun antesipada, prontu, karik partidu fó orientasaun atu mobiliza masa hotu, ami prontu atu mobiliza masa para apoiu partidu ba eleisaun antesipada, Kordenador Nasional Asosiasaun Profisional Edukasaun Militante FRETILIN, Raimundo Jeneto, ba GMN iha Comite Central da FRETILIN Comoro Dili, Sabadu (21/10).
Organizasaun Profesional Edukasaun Militante FRETILIN ne’e, mobilijadu husi baze mai to’o nasional, ho objetivu atu halo konsolidasaun ba estrutura FRETILIN kona ba partidu ninia servisu.
“Ami mós ko’alia oituan kona ba pontu situasaun, tanba ami nu’udar Profesional Edukasaun Militante FRETILIN, oinsa ami haree kona ba situasaun jeral polítika agora ne’e, liga ba ami nia setor edukasaun, nomós ami nia estrutura husi nasionál, Munisipiu to’o iha baze,” katak Raimundo.
Nia mós rekuñese katak, agora dadauk militantes FRETILIN balu simu rezultadu diskusaun entre Parlamentu Nasionál ho Governu kona ba programa VII Governu nian, ne’ebé la hamosu rezultadu diak.
“Agora ami konsolida ami nia kuadru sira ne’e hotu, tanba ho isu sira ne’ebé la’o, dalaruma balu des anima ho informasaun sira ne’e. Tanba ne’e ma kami halibur malu para oinsa ami konserta fali ami nia idea no hanoin sira ne’e hotu para prepara hodi hala’o servisu partidu nian,” relata Raimundo.
Nia esklarese, diskusaun ba programa Governu iha Parlamentu Nasional, husi bloku opozisaun haree liu ba aritmétika ho mós filozofia demokrásia ne’ebé opozisaun hateten, minoria tenki submete ba maioria, ne’e ida-idak nia razaun. Maibé Governu mós bazeia ba konstitusional, tanba opozisaun mós rekoñese Governu ne’e konstitusional duni.
“Ita simu rezultadu ida ne’e, no ami toma iha asaun kedas kona ba Sekretáriu Jeral FRETILIN ninia apelu katak, nia sei hala’o referendu ba dokumentu programa ne’e, entaun ami tenki mobiliza ona ami nia estrutura no militantes,” katak Raimundo Jeneto.cos
