Prezidenti Parlamentu Nasional (PPN), Arão Noe, informa, desizaun husi deputadu sira mak hakarak sosa duni kareta foun ba deputadu lejislatura dalimak liu husi plenária, maka nia sei la kansela hodi sosa kareta ba deputadu.
“Estudante sira lori petisaun ida ba Parlamentu Nasional, no sira la’os husu audiénsia, normalmente situasaun sira ne’e haruka karta ida mai husu audiénsia ne’e oin seluk ho hato’o petisaun, no petisaun iha ne’eba la hatete bainhira mak atu marka audiénsia ho sira, maibe sira ezije de’it maka to’o iha loron 5, fulan Novembru, tenki iha desizaun ida, no desizaun kona-ba kareta ne’e, la’os Prezidenti Parlamentu maka desidi, maibe ne’e dezisaun husi deputadu sira nian iha plenária”, dehan Arão Noe ba Jornalista sira hafoin hasoru malu ho Prezidenti Republika Fancisco Guterres Lú Olo, Tersa (30/10/2018) iha Palasiu Prezidensial Nicolau Lobato Bairo Pite Dili.
Nia akresenta, tamba aprova ona, no orsamentu privativu ne’ebé aprova ona iha plenária, no vise prezidenti asina, no haruka tiha ona ba iha Orsamentu Jeral Estadu.
“Sé aban bain rua maka orsamentu jeral debate espesialidade, maka deputadu balun hatama proposta elimina, ha’u prontu atu admite, ha’u prontu atu admiti ba debate no halo votasaun, ne’e plenária maka deisidi, no ne’e la’os Prezidenti Parlamentu mak desidi, ne’ebé sala sasaran diriji fali prezidenti maka tenki kansela ona, ha’u la bele kansela tamba ne’e desizaun plenária nian, agora iha loron 5 mai mos ami la bele desidi kedan atu elimina kedan”,realsa Arão.
Arão salienta liu tan katak, prosesu orsamentu sei debate iha loron 8 fulan Novembru tanba foin maka Governu hatama proposta orsamentu jeral Estadu ba Parlamentu Nasional, no ajenda ba debate parese iha fulan Dezembru .
“Prosesu sei tama tuir jeneralidade loron 3, epesialidade loron 10, dentru sira ne’e mak bele hatama proposta para elimina. Labele ida mai hakilar ami elimina, no ha’u halo depaisu ne’e la’os orgaun kolejial, maibe ne’e unipesoal ona, se komapañia unipessoal karik ha’u halo tiha ona”, subliña Prezidenti Parlamentu Nasional ne’e.
Iha diskusaun orsamentu privativu PN nian, deputadu sira hotu konkorda ona atu sosa kareta foun ba deputadu foun 48. No iha deklarasaun Prezidenti PN Arão Noe antes ne’e, katak, sira sei rekolla kareta hirak ne’ebé oras ne’e sei iha hela deputadu anterior sira nia liman.Oly
