Prezidenti Parlamentu Nasional (PPN), Arão Noe, informa, manifestasaun ne’ebé halo husi Movimentu Universitáriu Timor-Leste ( MUTL) ne’e, PN sei la muda virgula ida husi desizaun ne’ebé mak atu sosa duni kareta foun ba deputadu sira.
Arão Noe konsidera, manifestasaun ne’ebé MUTL halo ne’e, direitu sira nian hodi manifesta sira-nia hanoin kona ba situasaun ida.
Tuir Arão Noe, Parlamentu Nasional tenki prepara kondisoens ba deputadu sira hodi hala’o sira nia kna’ar fiskalijasaun tuir konstituisaun haruka.
“Parlamentu tenki halo nia kna’ar tuir saida mak iha, no atu halo fiskalizasaun, deputadu sira tenki iha kareta para fasilita sira nia servisu. Tanba ne’e mak ami dehan, direitu sira nian atu halo demonstrasaun, maibé Parlamentu tenki prepara kondisaun ba deputadu sira hanesan orgaun sira seluk, deputadu sira labele la’o ain hodi halo servisu”,katak Arão Noe ba jornalista sira iha Ministériu Finansa, Aitarak Laran, Dili, Sesta (26/10/18)
Nia hatutan, kona ba kareta Prado sira ne’ebé make eis deputadu terseira lejislatura seidauk entrega ne’e, Parlamentu Nasional halo ona prosesu hodi obriga sira entrega fali kareta.
“To’o agora kareta 30 resin mak seidauk entrega, ami foti ona desizaun no haruka ona karta dala tolu ba ba eis deputadu sira no sira nia partidu, atu entrega fali kareta, maibé to’o agora la entrega”,relata Arão.
Prezidenti Parlamentu Nasional ne’e lori Parlamentu nia naran agradese deputadu nain rua husi FRENTI Mudança, tanba sira entrega fali ona kareta ba Parlamentu Nasional.
Nia afirma, tuir lolos estudante MUTL sira halo demonstrasaun hasoru eis deputadu sira ne’ebé mak seidauk entrega fali kareta, la’os kontra fali desizaun atu sosa kareta ba deputadu foun sira.
“Osan leilaun nian ne’e, Parlamentu Nasional devolve fila fali hotu tiha ona iha fim do mandatu terseira lejislatura nian, tanba ne’e kareta sira ne’e ami trata hanesan kareta Estadu nian. Se sira la entrega, ida ne’e urusan seluk ho prosesu judisial, mas hanesan meja parlamentu, ami iha responsabilidade ba deputadu sira ne’ebé laiha transporte”, katak Arão.cos
