Prezidenti Republika, Francisco Guterres ‘Lu-Olo’ hatete, tempu ba Estadu Timor Leste atu fo apoiu finanseiru no material ba Organizasaun Non Governamental Centru Estudu ba Paz no Dezenvolvimentu (CEPAD) atu garante centru CEPAD habelar liu tan nia kampaña sivika ba publiku tomak.
Prezidenti Republika hato’o deklarasaun ne’e hafoin lansa manual treinamentu iha seitor publiku no Website ONG CEPAD nian foin lalais nee iha Díli.
“Haree ba importansia CEPAD nian biar nia servisu barak Estadu nian, hau mai rasik iha ne’e hodi enkoraja no apoiu nudar Prezidenti da Republika, molok mai iha ne’e hau buka estuda materia sira ne’ebe hau simu husi CEPAD iha tempu uluk kedas, haree ba marterial sira ne’ebe CEPAD produs ona no ba Politika programa dedikasaun husi fundador no membru sira iha tinan sanulu resin nia laran, hau hanoin katak , tempu to on ba Estadu Timor Leste. Hodi fo apoiu material no finanseiru atu garante centru ne’e habelar liu tan kampaña sivika permanente ba publiku tomak” dehan Prezidenti Republika Sesta Feira (26 / 10 2018) iha Hotel Timor Dili .
Lu-Olo hatutan, ne’e hanesan esperitu atu ema hotu hakoak no haburas Paz, tamba ne’e ho projetu uma paz CEPAD nian, tenki kontinua hari uma paz iha Munisipiu hitu, no autoriedade relevante sira presija haree oinsa atu fo apoiu ba CEPAD, iha Munisipiu sira seluk.
“CEPAD nudar parseiru ativu ba konsiente Estadu nian, merese hetan apoiu husi ita hotu nian, tamba ne’e hau aproveita apelu ba partidu politiku sira organizasaun sosiedade sivil no relijiosa atu ajuda halo kampania hasoru korupsaun, ita hotu hatene katak ohin loron ita seidauk iha Lei Anti Korupsaun iha tentativa barak Parlamentu Nasional deskuti iha plenaria, maibe ida ne’e seidauk akontese” akresenta Lu-Olo.Oly
