Prezidente Tribunal Rekursu (PTR), Deolindo dos Santos, deklara katak, sira-nia parte husu no rekomenda ona ba entidade kompetente atu kumpri rekomendasaun sira ne’ebé fiksa ona iha relatóriu auditoria ba Zona Espesial Ekonomia Sosial Merkadu (ZEESM), tanba relatóriu ne’ebé produs bazeia ba faktus mak iha, ho praju fulan 6 nia laran.
Deolindo dos Santos, hatete tan, kona-ba auditoria ne’e, tuir lei la permite atu nia fo komentáriu ba relatóriu ne’ebé nia rasik hala’o, maibe sira rekomenda ona ba autoridade kompetenti.
“Kona-ba auditoria ZEESM ne’e, hanesan relatóriu ikus ne’ebé ami hasai Câmara de Contas iha Tribunal Rekursu nia komptensia, hasai relatóriu ikus liu mak ZEESM, maibe iha mos relatóriu seluk ne’ebé ami hasai tiha ona, antes ZEESM rasik, ida ne’e mak publiku sira presiza hatene”,dehan Deolindo dos Santos, hafoin remata enkontru semanal ho Prezidenti Repúblika, Francisco Guterres ‘Lú Olo’, Segunda (8-10-2018), iha Palásiu Prezidensial Nicolau Lobato, Bairo Pite, Díli .
Nia afirma auditoria ZEESM ne’e, publika ona iha Website Tribunal Rekursu nian. “Se públiku hakarak hatene konaba relatóriu auditoria ne’e, bele haree deit iha ne’eba, tamba iha ne’eba relatóriu hotu kompletu”,tenik tan.
“Ha’u hanoin kona-ba ba ZEESM ne’e, ha’u la bele emite fali ha’u nia opiniaun ba buat ne’ebé ha’u rasik mak halo, no lei la permite ida ne’e, ha’u ho Prezidenti Repúblika rasik la aborda kestaun ida ne’e, tamba ne’e kompetensia Tribunal Câmara de Contas ninian, ne’ebé mak haree ida ne’e. Ha’u sei la diskuti prosesu konkretu ho Prezidenti Repúblika”,realsa Deolindo dos Santos.
Tuir Prezidenti Tribunal Rekursu ne’e, relatóriu ne’e bele iha faktus, maibe ne’e la’os kompetensia Tribunal ninian, presiza hatene kualker relatóriu ne’ebé hasai husi Câmara de Contas, ne’e nu’udar relatóriu ne’ebé relata faktus, depois ho ida ne’e mak nia rekomendasaun no relatóriu sira ne’e haruka ba entidade sira ne’ebé lei ne’e rasik hatete, depois sira bele halo tuir sira-nia kompetensia.
Iha relatóriu auditoria Tribunal de Contas nian ba ZEESM, ne’ebé lidera husi Mari Alkatiri, iha infrasaun ne’ebé fo prejuizu ba Estadu ho montante millaun US$ 30.Oly
