GMN TV Politika Xanana: Povu maka sosa asaun 30% husi ConocoPhillips ■Neineik GS sei to’o TL

Xanana: Povu maka sosa asaun 30% husi ConocoPhillips ■Neineik GS sei to’o TL

2 views

Atu reforsa prosesu dezenvolvimentu iha área agrikultura, turizmu no selu-seluk tan, iha Timor-Leste (TL), Xefi Negosiador Prinsipal Fronteira, Kay Rala Xanana Gusmão, sosa ona asaun ConocoPhillips 30% vale ba osan ho millaun US$350 ne’ebé mai husi osan povu nian.

Xefi negosiador ho ninia delegasaun, fila mai Díli  ho aviaun Sriwijaya, iha aeroportu internasional Nicolau Lobato,  Segunda (8/10), iha   tuku 01, liu minutu 30, no simu husi populasaun rihun ba rihun hodi fo apresiasaun no agradese ba heroi bo’ot Kay Rala Xanana Gusmão, ne’ebé konsege konvense kompañia Petroleu Amerikana ConocoPhillips nia asaun, hodi la’o ain husi Aeroportu Comoro to’o bairu grilus.

Iha observasaun, populasaun ho lideransa AMP sira hanesan PLP, KHUNTO no mos UDT/FRENTI MUDANÇA simu Xefi negosiador FM ne’e, laiha ema ida mak lori atributu partidu, tamba tuir lideransa sira katak, asuntu ne’e interese nasional la’os interese partidaria.

Iha espanduk ne’ebé hakerek hodi simu Xanana Gusmão iha Aeroportu Díli, hakerek, “Adeus Duvida Benvindu Kadoras GS mai TL”.

“Ida ne’ebé defende makaas atu lori Greater Sunrise (GS) ba Darwin ne’e maka ConocoPhillips, tanba fasilidade Bayu Undan iha Darwin ne’e ninian, wainhira ami desidi dehan labele nia dehan, prontu ami komprende imi-nia hakarak, tanba ida ne’e maka ita sosa ninia asaun (saham-red). Nia (ConocoPhillips-red) iha 30%, ita diskuti katak ho dólar Amerikanu millaun 350, ita sosa, há’u la manan buat ida, tanba há’u uza Estadu nia osan, povu nia osan ne’e Estadu maka jere, nune’e la’os Estadu nian, maibé lori povu nia osan ne’ebé sosa ho ran no sosa ho mate maka hola”,Xefi Negosiador Prinsipal Fronteira TL, liu husi konferensia imprensa ne’ebé realiza iha sede CNRT, Bairo Formoza, Díli, Segunda (08-10-2018).

Nia esplika, ida ne’ebé lakohi liu atu lori kadoras mai TL maka ConocoPhillips, maibé tanba kompañia refere aseita ona, tenki agradese ba sira-nia kompriensaun di’ak, liu husi akordu ne’ebé maka asina ona, ba futuru bele utiliza ba dezenvolvimentu nasional.

“Ami defende bei-beik, atu fó servisu, atu dudu agrikultura no turizmu, husi 2007 CNRT kaer ukun la’os dehan kumpri de’it, maibé buka tuir hodi hatene, ita iha. Buat sira ne’e la la’o mós Beasu sei la’o, tanba ami iha hela, la’o nei-neik ba nei-neik ba nei-neik, GS sei to’o TL, maibé tenki iha planu no vizaun”,haktuir Kay Rala Xanana Gusmão.

Líder karismátiku ne’e, sujere, atu dada kadoras GS mai TL, presiza konfiansa ba malu no husu mós ba matenek na’in sira iha TL koko estuda to’ok planu estratéjiku dezenvolvimentu nasional 2011 no 2030, para implementa prosesu dezenvolvimentu ho di’ak.

“Ita-nia servisu atu dada kadoras GS agora maka atu hahú, la’os há’u maka atu halo servisu, maibé ekipa sira iha petroleu ninian, há’u sei dudu joven sira, ita la’o hamutuk no haree, maka buat ne’e sei sai realidade. Buat hotu bele mosu iha ita-nia rai, iha polítika no saída de’it, tanba ita-nia independensia ne’e polítika, tanba ne’e ita buka independensia ekonómika”,informa Xanana Gusmão.

Xefi Negosiador Fronteira TL, Kay Rala Xanana Gusmão, garante, katak iha futuru bainhira kadoras dada ona mai TL sei reforsa no dezenvolve área agrikultura no turizmu.

Antes ne’e, soseidade sivil kestiona maka’as kona-bá osan ne’ebé Estadu TL uza hodi sosa asaun ne’e, mai husi ne’ebé. ves


Banner

Foto

Notisia Ikus

Xanana: Horta sai PR ne’e povu nia vitória

May 16, 2022
Prezidente Partidu CNRT, Kay Rala Xanana Gusmão...

PN haruka Proposta-Lei OR ba PR Lú Olo

May 13, 2022
Parlamentu Nasionál (PN), haruka Proposta-Lei O...

PR eleitu sei deklara TL prontu adopta DFU

May 13, 2022
Prezidente Repúblika (PR) eleitu, José Ramos H...

Projetu Lei regula knaar PR, hamosu kontradisaun boot ho K-RDTL

May 12, 2022
Legalista Avelino Coelho hatete, Projetu-Lei reg...

Porta-Voz PR eleitu: OR ho intensaun sosa votu iha ElPar 2023

May 12, 2022
Porta-Voz Prezidente Repúblika (PR) eleitu, Dio...
1 2 3 725

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker