Bankada CNRT iha uma fukun Parlamentu Nasionál (PN) husu ba Câmara de Contas (CC) atu halo auditoria kona-bá utilizasaun servisu profisionál ne’ebé boot iha Gabinete Primeira Vise Primeiru Ministru (PM) no Ministra Solidariedade Sosiál no Inkluzaun (MSSI), Armanda Berta dos Santos ninian.
“Kona-bá orsamentu ne’e Vise PM no MSSI presiza halo esplikasaun atu ita boot nia orsamentu rasik, tanba iha Gabinete Vise PM mós ita boot aloka servisu profisionál ne’ebé prevé orsamentu 40.000 resin no iha MSSI iha servisu profisionál no prevé orsamentu rihun 300, ha’u liga ho servisu profisionál iha OJE 2020 prevé orsamentu tokon USD 80, nune’e orsamentu ne’e barak tebes“, Deputada bankada CNRT, Carmelita Caetano Moniz liu husi ninia intervensaun iha debate OJE 2020, iha faze espesialidade, Segunda (05-10-2020).
Nia akresenta, durante hala’o audénsia iha komisaun sira Vise MSSI mak partisipa, sera que ida ne’e iha nesesidade Gabinete Vise PM mós iha asisténsia téknika no mós iha Gabinete MSSI mós iha tan Gabinete asisténsia téknika.
”Ita hanoin atu diminui OJE no halo poupansa, maibé to’o ikus ita gasta barak liu. Iha ministériu barak la kumpre dekretu lei ne’ebé atribui ba membru Governu sira atu bele fó servisu ba tékniku sira iha gabinete iha kada ministériu, tanba ne’e ami sei husu auditoria ba CC kona-bá utilizasaun servisu profisionál ne’ebé boot tebes”, tenik Carmelita.
Entretantu orsamentu tinan 2020 ba Vise PM hamutuk rihun 100, húsi orsamentu refere ba bens servisu aloka rihun 100, ba saláriu i vensimentu, transferénsia públika, kapitál menor no kapitál dezenvolvimentu zero (0).
Maske hetan ezijénsia husi deputada CNRT, Carmelita Moniz, maibé Primeira Vise, Armanda Berta dos Santos, deside lakohi fó komentáriu. ety
