Reprezentante povu iha uma fukun Parlamentu Nasionál (PN), deputada CNRT, Maria Gorumali Barreto, ezije ba Governu atu halo pagamentu subsídiu USD 200 agregadu ba família reklamante sira.
“Subsídiu ekonomia ne’ebé ba iha família sira, ami simu SMS mai husi família balun Ministériu Administrasaun Estatal (MAE) haruka nia ema rekolla visa família, maibé seidauk halo pagamentu”, Deputada bankada CNRT ne’e iha PN, Sábadu (03-10-2020).
Maria akresenta, maske MAE rekolla ona visa família, maibé to’o ohin loron seidauk halo pagamentu, nune’e Governu presiza halo esplikasaun.
Primeira Vise Primeiru Ministru (PM), Armanda Berta dos Santos, relasiona ho subsídiu USD 200 agregadu ba família reklamante sira, ne’e MAE presiza halo klarifikasaun no justifikasaun ba dadus agregadu familiár 12.000 resin.
“Durante ne’e ita halo diploma ministériál konjunta hamutuk ho MAE, hodi haree kona-bá reklamasaun sira ne’e, ita sei iha prosesu atu halo pagamentu ba agregadu família ne’ebé halo reklamasaun”, klarifika Governante ne’e.
Tuir dadus família reklamante ne’ebé seidauk simu subsídiu USD 200 hamutuk rihun 10 resin.
Entretantu tuir dadus iha faze primeiru, Governu aloka orsamentu hamutuk millaun USD 63,6 ba pagamentu subsídiu uma-kain 318.302 no ba uma-kain 14.175 mak seidauk simu subsídiu USD 200.
Dau-daun ne’e Governu liu husi Ministériu Solidariedade Sosiál no Inkluzaun (MSSI) sei halo verifikasaun dadus hafoin haruka ba Ministériu Finansas (MF) atu halo pagamentu. ety
