Deputada bankada CNRT, Bendita Moniz Magno, liu hosi nia intervensaun iha diskusaun proposta Orsamentu Jerál Estadu (OJE) 2020, husu Primeiru Ministru (PM) atu halo avaliasaun ba asaun polítika ne'ebé durante ne'e halo, hodi impase polítika la'o ho tempu naruk.
"Xefe governu ko'alia kona-bá Estadu direitu, sera que xefe Governu halo ona reflesaun ba hahalok violasaun konstituisaun sira ne'ebé durante ne'e partidu 2, inklui partidu ne'ebé Xefe Governu rasik lidera ne'e viola hela. Ita labele halo retórika oi-oin, maibe tenke hatene iha ita-nia hahalok, tanba prátika mak vale liu liafuan", tenik Deputada opozisaun ne'e iha diskusaun OJE 2020, Kinta (01/10/2020).
Deputada CNRT ne'e afirma tan, kríze polítika ne'ebé iha, la'os hosi povu ki'ik, maibe rezultadu polítika hosi polítiku sira.
"Nasaun la sente orgullu, bainhira ita buka rezolve kríze polítika ne'e liu hosi violasaun konstituisaun RDTL, tuir loloos ita hotu respeita no obedese KRDTL, la'os sama fali, tuir ita nia hakarak. Nasaun ida atu iha integridade no prósperu, ukun nain no bandu tenke la'o tuir Konstituisaun, la'os ses fali hosi koridór konstituisaun", realsa Bendita.
Alende ne'e, deputadu bankada PD, Adriano do Nascimento, afirma, nia parte konkorda ho deklarasaun CNRT nian kona-ba violasaun Konstituisaun, tanba ne'e, nia parte dezafia líder sira buka solusaun ikus liu hosi Tribunal.
"Ita nia reseitas hosi Bayu Undan menus ba dadaun, depois prosesu de dezenvolvimetu Greater Sunrise mós seidauk iha serteza, alénde ne'e Estadu mós seidauk hetan mina matan seluk atu subtitui, aat liu tan COVID paraliza ekonomia mundial, no liu-liu Timor-Leste, tanba ne'e na’i-ulun sira tenke rezolve problema ne'e, buat ida ne'e la haree opozisaun ka Governu, kuandu ita la sériu, ita-nia nasaun sei hasoru problema. Ho ida ne'e iha solusaun ida mak ita bele tetu hamutuk, ida mak Governu halo ona atu halo rekuperasaun ekonómika, maibe sujere atu implementa dadauk ona, para buat ruma ne'ebé seidauk loos ita bele hadi'ak, nune'e tenke iha solusaun ba Estadu, ne'e kestaun Estadu nian, la'os kestaun Governu ida ne'e nia ka ba Parlamentu Nasional. Solusaun segundu mak nasaun ida ne'e presiza duni konsensus nasionál, la'os signifika ita atu fahe pasta ba malu, maibe konsensus nasionál ida ne'ebé ita tenke knosensus duni no apoiu inisiativa governu nian ne'ebé kona-bá pakote rekuperasaun ekonómika, depois ita haree ida ne'ebe sala dehan sala. Ita mós tenke konsensus ona hodi buka mina-matan nu'udar alternativa, no ida seluk aselera ona dezenvolvimentu Greater Sunrise, se lae ita-nia nasaun hasoru problema, problema la'os Governu nian de'it, maibe problema nasaun tomak, dignidade nasaun nian, liu-liu polítika atu hasees-an hosi Indonézia, se ita la rezolve, ita hotu nia luta ne'e sai en kestaun. kestaun ne'ebé iha ne'e, kestaun interpretasaun ba konstituisaun, saida mak CNRT sira dehan ne'e Governu inkonstitusional ne'e sira mós loos, maibe bankada Governu mós la sala, tanba prinsípiu de inosénsia ne'e sei iha, ida ikus liu ne'e Tribunal, nasaun ne'e tenke hatúr iha lei nia okos mak so juíz sira mak bele interpreta", sujere Deputadu PD ne'e.
Entretantu, diskusaun OJE 2020 ne'e iha faze jeneralidade loron rua no tuir ajenda sei aprova final global, iha loron 8, fulan Outubru ne'e. Say
