Xefe bankada FRETILIN, Francisco Miranda Branco, liu hosi deklarasaun bankada, husu ba meza Parlamentu Nasionál (PN) atu re-abertura lei de autór ne’ebé kaduka hosi eis deputadu III lejislatura.
Pedidu ne’e, liga ho loron nasionál kulturál ne’ebé sei selebra iha loron 14, fulan Outubru ne’e.
“Tempu to’o ona ba Timor-Leste nu’udar Estadu no nu’udar nasaun, hodi harí ita-nia sentru kulturál rasik, nune’e bele dezenvolve ita-nia atividade kulturál sira. Harí mós muzeu no monumentu sira hodi rai hela obra artístika sira hodi prezerva mós ita nia memoria. Kria biblioteka, reforsa literásia ba juventude, nune’e dezenvolve kultura lee no koñesimentu ba jovens sira”, Xefe bankada FRETILIN ne’e liu hosi deklarasaun bankada, iha plenária, Tersa (13/10/2020).
Bankada FRETILIN mós husu ba Estadu atu valoriza kantor señior sira ne’ebé kontribui ona ba Timor-Leste nia independénsia.
“Apresia tebes ita nia Estadu ne’ebé atu kondekora ita nia kantór saudozu Siku Maulohi, luta nain no artista lejendáriu ida, nu’udar mós kompozitór, saúdozu hananu knananuk sira ne’ebé liga ho rezisténsia ne’ebé hafalun ho linguajen ba-bain, hodi relata sofrimentu luta sakrifísiu Timor-oan nian durante luta okupasaun Indonésia”.
“Obra artístiku ita-nian, atu ita-nia rasik sai na’in no valoriza no fó dimensaun luan iha ita-nia moris loro-loron, labele fó biban ba ema seluk sai na’in ba ita-nia rai no ita sai penontong”.
Alénde ne’e, deputadu bankada PLP, Abel Pires reforsa katak, to’o ona tempu Timor-Leste atu sai na’in ba nia produtu rasik.
“Hein katak ita bele halo komemorasaun no festeza ba loron importante ida ne’e”.
Antes ne’e, asosiasaun múzika Timor-Leste hamutuk ho konselleiru eis deputadu Eladio Faculto, hasoru malu ho Xefe bankada FRETILIN, hodi rekomenda atu Parlamentu Nasionál halo re-abertura ba projetu lei ne’ebé kaduka hosi lejislatura anterior kona-bá direitu autór, nune’e Timor-Leste bele valoriza produtu artístiku sira, inklui kulturál Timor nian, nune’e ema seluk labele kópia, liu-liu hanesan Tais Timor ne’e rasik. Say
