Ministru Koordenadór Asuntu Ekonómiku (MKAE), Joaquim Amaral, subliña, impaktu husi Corona Virus Disease 2019 (COVID-19), VIII Governu lideradu husi Primeiru Ministru (PM), Taur Matan Ruak, tenke implementa polítika rekuperasaun ekonómika, tanba pandémia refere sai hanesan problema mundiál hodi fó impaktu ba ekonomia mundiál, inklui ba Timor-Leste.
Maibé, MKAE ne’e hateten, ho Orsamentu Jerál Estadu (OJE) tinan 2020, sei loke dalan no fó oportunidade hodi inísia fali dezenvolvimentu no fó mudansa ba kresimentu ekonomia ne’ebé monu.
“Nia (COVID-19) implikasaun ne’e boot tebes, tanba fó mensajen ba merkadu katak, Estadu ho orsamentu ne’ebé iha programa barak bele hahú ona, tanba ekonomia ne’e investimentu boot liu husi setór privadu, tanba ne’e mak orsamentu ne’ebé aprova nia signifikadu ne’e boot tebes ba ita-nia ekonomia, tanba ne’e setór hotu bele book-an reinísia ou reativa sira-nia atividade. Ita presiza prosesu tranzisaun hodi rekupera”, Governante ne’e ba GMN iha Parlamentu Nasionál (PN), Kinta (08-10-2020).
Joaquim akresenta, maske OJE 2020 nia periódu ezekusaun badak, maibé importante merkadu hatene kondisaun atu rekupera ekonomia, inísia dezenvolvimentu no agora mak bele lori fali kresimentu.
Entretantu wainhira Governu deside polítika ba rekuperasaun ekonómika liu husi fó apoiu ba kompañia sira, númeru ba rejistu kompañia foun sa’e maka’as, hahú husi fulan Jullu to’o Setembru, númeru rejistu foun kada fulan entre 400 to’o 500 resin, inklui ho kompañia ne’ebé halo renovasaun sa’e to’o 300.
Tuir dadus husi Servisu Rejistrasaun no Verifikasaun Emprezariál (SERVE) dau-daun ne’e númeru kompañia ne’ebé sei kontinua ativu hamutuk rihun rua nulu resin sia (29.000) maioria kompañia nasionál, inklui kompañia internasionál ne’ebé loke sukursál iha Timor-Leste okupa de’it númeru 100 resin. ety
