Uma fukun Parlamentu Nasional (PN) nota kapasidade Governu atu kontrola sidadaun tama-sai ilegál iha fronteira terestre sei frájil, tanba durante implementasaun Estadu Emerjénsia (EE) sidadaun kontinua tama-sai ilegál.
“Konforme informasaun ne’ebé ita hetan polísia kaer sidadaun balun liu husi dalan tikus ba to’o iha munisípiu sira balun ita-nia, signifika ita-nia kapasidade atu kontrola iha fronteira terestre sei frájil, tanba saída mak ita labele mobiliza polísia husi munisípiu sira atu reforsa seguransa iha fronteira, atu nune’e ema labele haksoit liu fronteira ba iha munisípiu, ida ne’e perigu tebes”, Deputadu bankada FRETILIN, Joaquim dos Santos liu husi ninia intervensaun iha debate estensaun EE ba dalima, iha PN, Sábadu (03-10-2020).
Nia akresenta, maske durante ne’e polísia konsege deteta sidadaun tama-sai ilegál, maibé balun polísia konsege deteta no ba subar-an iha área rurál no iha sidade sira, nune’e sai ameasa ba komunidade sira.
Iha fatin hanesan, Xefe bankada CNRT, Duarte Nunes, sekunda, opiniaun husi deputadu Joaquim dos Santos katak, presiza atu kontrola sidadaun sira tama-sai Ilegál iha fronteira.
“Presiza update situasaun iha fronteira dezafiu entrada ilegál ha’u bele klasifika iha ilegais Timor-Oan iha Indonézia, maibé sira-nia dokumentu kaduka, la konsege renova, situasaun ida ne’e Governu presiza buka solusaun, la presiza tama legál no la presiza halo entendimentu ho migrasaun iha fronteira. Situasaun negosiante halo ilegál ne’e, tanba nesesidade mak obriga sira, tanba ho implementasaun EE sira tenke buka moris, Governu iha obrigasaun atu bele fó solusaun ba sira”, tenik Xefe bankada CNRT ne’e.
Duarte husu mós ba Governu atu fó sansaun ba Grupu Arte Marsiál (GAM) ne’ebé tama-sai ilegál iha fronteira terestre no tenke hapara situasaun ida ne’e, tanba bele lori moras COVID-19 ba komunidade sira.
Entretantu, Primeiru Ministru (PM), Taur Matan Ruak, relata, durante implementasaun EE dalima, sidadaun tama sai-ilegál hamutuk 390, inklui membru Persaudaraan Setia Hati Terate (PSHT) na’in 222. Ety
