Primeiru Ministru (PM), Taur Matan Ruak, promete sei lori fila estudante ou Timor-oan sira ne’ebé oras ne’e dau-daun iha nasaun Israel hamutuk 70 resin mai Timor-Leste (TL).
Xefe Governu ne’e, hatete, sei lori fila estudante ou Timor-oan sira ne’e iha Israel, maibé sei haree mós oportunidade husi nasaun sira seluk ne’ebé hakarak mós tula fila sira-nia sidadaun, tanba Timor-Leste rasik, enfrenta hela difikuldade kona-bá voo entre kontinentál.
“Kestaun ne’ebé sei trata ho Ministériu Negósiu Estranjeiru no Kooperasaun, tanba ne’e ita haree to’ok, ita boot sira hatene difikuldade kona-bá voo sira entre kontinentál ne’e susar la halimar, mas ita halo ona esforsu barak, lori ona ita-nia sidadaun balun, balun mai husi Israel, balun mai husi Cuba, Portugal no iha fatin-fatin, ne’e tenke haree oportunidade sira ne’e mak ita foin aproveita, tanba atu selu de’it aviaun ida hodi ba tula de’it emá nain 4 ou 5 ne’e imposivel ita halo ida ne’e,” PM ne’e ba jornalista sira, Kinta (15/10/2020), iha Palásiu Prezidensiál, Nicolau Lobato, Bairro Píte.
Iha fatin hanesan, Ministru Agrikultura no Péska (MAP), Pedro dos Reis, hatete, dau-daun ne’e estudante ne’ebé remata ona sira-nia estudu iha Israel, iha ona prosesu nia laran atu lori sira fila mai TL.
“MAP iha koordensaun ho MNEK atu oinsa lori sira fila-fali, ne’e prosesu la’o hela, data fiksa seidauk, tanba ne’e ministériu ida ba ministériu ida ne’e prosesu, ha’u só hatete de’it prosesu la’o, ida ne’e mak meiu ami halo hela hodi trata lori sira fila,” dehan Pedro.
Timor-oan sira ne’e, Governu haruka ba tuir treinamentu kona-bá agrikultura avansadu iha Israel, hahú husi loron (14/08/2019) no dau-daun ne’e remata ona sira nia estudu.
Timor-oan sira ne’e, mai husi UNTL, UNITAL, ETCI, UNPAZ, SPP Maliana, Natarbora no Fuiloro. Jen
