Parlamentu Nasionál aprova Proposta Alterasaun (PA) rua ba Ministeriu Edukasaun Juventude no Desportu (MEJD) no retira PA tolu ba Ministériu Saúde (MS).
Proposta alterasaun ne’ebé deputadu kinta lejislatura aprova ho númeru 23 no 24 ba MEJD, no retira proposta 21, 22 no 44 ba MS.
Mudansa orsamentu hosi dotasaun hotu governu rezerva kontizensia tokon USD 13.792 ne’e, hasai rihun atus-ida resin ba Ministériu Edukasaun, hodi halo pagamentu ba projetu reabilitasaun eskola iha munisípiu, inklui kobre kustu ba profesor sira nia formasaun no kopia dokumentu hotu.
Proponente ba proposta alterasaun ne’e, deputada bankada FRETILIN, Josefa Âlvares Pereira, argumenta, proposta refere pertinente tebes, nune’e Governu labele iha dívida bei-beik.
“Ida ne’e atu halo pagamentu ba konstrusaun reabilitasaun eskola ne’ebé nia prosesu ne’e remata ona, hanesan ita hotu hatene, projetu pagamentu konstrusuan hotu-hotu nia pagamentu ita la’os selu hotu kedas, ita sempre hela 10% para bele garante ninia konstrusaun, konstrusaun ne’e hamutuk 9 eskolas, liu tiha ona tempu de garantia kualidade, entaun kabe agora ba governu atu selu projetu sira ne’e”.
Deputada Josefa apezenta justifikasaun katak, ho ida Governu labele iha dívidas barak, maske ki’ik-oan, maibe kuandu ita la selu bebeik bele sai dívida boot ba Estadu, tanba ho aktu sira ne’e, empreza ba halo fali kréditu iha banku, automátikamente iha jurus ne’e hanesan razaun ida ba empreza sira, karik iha projetu tuir mai sira husu projetu nia valór boot tebes.
Hatán ba asuntu ne’e, Ministru Edukasaun Juventude no Desportu, Armindo Maia, hateten, pagamentu retensaun porsentu 10 ne’e presiza realiza duni, nune’e, labele aumenta dívida ba iha Orsamentu Jerál Estadu (OJE) tinan 2021.
“Tuir ADN nia verifikasaun pratikamente eskola 9 ne’e 100% hotu ona, entaun ita presiza selu osan ida 10% ba retensaun ninian ne’e, ne’e ami sei selu verifikasaun ADN nian, se agora la selu, signifika tenke sai dívida ba OJE 2021,” informa Governante ne’e.
Enkuantu, Vise Ministra Finansas, Sara Lobo Brites, hateten, pagamentu retensaun porsentu 10 ne’e, tuir loloos prevê iha preparasaun proposta ministériu nian nian, la’os foti fali hosi rezerva kontijensia, tanba halo redusaun maka’as iha fundu kontijénsia, sei difikulta Governu, bainhira iha nesesidade urjente iha durante fulan rua ba oin.
“Ami mós preokupa uitoan to’o fim do ano karik iha kalamidade ka akontese buat ruma ita sei iha difikuldade atu rekore ba rezerva de kontijénsia, tanba nia limitasaun ne’ebé mak iha. Hanesan babain iha fim do ano kuandu governu husu atu fó saláriu 13 ka désimu terseiru ba funsionáriu administrasaun públika, fonte ne’e mak rekore, tanba ministériu barak mak laiha orsamentu. Laiha intensaun atu la fó apoiu, maibe se bele ita labele atu rekore fundu kontijénsia, ida ne’ebé mak labele liu karik konstrusaun eskola, tanba retensaun 10% ne’e tuir loloos ministériu tenke inklui iha ninia proposta orsamentu ne’e, hatene hela maibe la prevê, tuir loloos tenke inklui iha preparasaun orsamentu,” tenik Sara Lobo.
Entretantu fundu rezerva kontijénsia ne’e, atu finansia atividade ne’ebé mak urjente. Maske nune’e, proposta alterasaun númeru 23, 24 ho rua-nulu ne’e pasa ho votu a favór 42, kontra 0 no abstensaun 21.
Alénde ne’e, iha mós proposta alterasaun tolu hosi deputadu sira ba Ministériu Saúde nian, maibe la konsege halo aprovasaun no retira hikas hosi deputada proponente, tanba Governu kompromete atu responde liu hosi fundu COVID-19. Say
