Uniaun Europeia ho Programa Nasones Unidas ba Dezevolvimentu (PNUD) apoia konstrusaun uma komunikasaun ba Parlamentu Nasionál (PN) hodi fasilita jornalista Radío Parlamentu ho jornalista destakadu sira atu bele kobre informasaun iha PN ho di’ak liu-tan.
Iha serimonia lansamentu ne’e, Prezidente PN, Aniceto Guterres, hateten, inisiativa ne’e mosu, nu’udar kompromisu PN nian, hodi fornese kondisaun servisu ne’ebé adekuadu ba jornalista sira, hodi kobre sesaun Parlamentár.
“Se permite jornalista sira hetan fatin di’ak liu, hodi servisu, ita ajuda sira hodi informa sidadaun sira di’ak liu-tan, kona-bá servisu sira ne’ebé la’o hela iha PN, nune’e instituisaun besik liu ba povu no sira nia inspirasaun”, tenik Aniceto iha nia diskursu, bainhira lansa fatuk dahuluk, Kuarta (30/09/2020).
Iha biban hanesan, embaixadór delegasaun Uniaun Europeia iha Timor-Leste, Andrew Jacobs afirma, liu hosi kondisaun ne’ebé adekuadu ba jornalista, bele halo reportájen lejislativu no harí relasaun ne’ebé efetivu liu tan ho PN.
“Liu hosi programa ida ne’e, ami mós intende atu apoiu planu hodi estabelese kanál komunikasaun online ida entre PN ho sidadaun Timor-oan sira, hosi sistema online, hodi halo komunikasaun ba ema sira.
No ami mós hakarak apoiu projetu ida ne’e ho métodu dijitalizasaun ba enkontru sira iha PN”, informa Andrew.
Entretantu, uma komunikasaun ne’e, finansia porsentu 100 hosi Uniaun Europeia, ho pakote formasaun jornalista ba funsionáriu PN, inklui apoiu ekipamentu ba Rádio Parlamentu, osan kuaze USD 232 milloens. Tuir tárjetu, uma komunikasaun ne’e, sei remata iha fulan rua nia laran. say
