GMN TV Politika FRETILIN preokupa estratejia polítika lider AMP ''CNRT konsidera ne’e normal''

FRETILIN preokupa estratejia polítika lider AMP ''CNRT konsidera ne’e normal''

0 views

Prezidenti bankada FRETILIN, Francisco Branco, preokupa, ho estratejia polítika husi líder partidu CNRT, PLP, no KHUNTO, ne’ebé hala’o konferensia imprensa iha rai liur Singapura hodi hametin no ofisializa ezistensia Aliansa Maioria Parlamentar (AMP).

Tuir Branco, laiha lójika, bainhira nasaun ne’e la’o hakmatek ba ko’alia polítika ka kestoens nasionál iha ema nia nasaun.

“Hau ladun kontente, kuandu ko’alia problema nasionál iha ema nia rain, nusa mak lako’alia iha ita nia rain, laiha lójika, tanba nasaun ne’e hakmatek hela,”hateten Prezidenti bankada FRETILIN, Francisco Branco ba jornalista iha Parlamentu, Kuarta(22/11/2017).

Líder bankada FRETILIN ne’e subliña, polítika atual ne’ebé líder bo’ot sira agora dadaun halo, sei la rai eransa polítika diak ba jerasaun foun iha poresu konstrusaun Estadu.

“Tuir loloos seriedade polítika diak hanesan mós saída mak FRETILIN halo tiha ona, bainhira koligasaun entre CNRT,PD no Frente Mudansa nakfera, FRETILIN prontu kedan atu suporta governu, maske minoria, ne’e mak dehan polítika konstrutiva, la’os atu hatun malu fali, tanba ne’e ladun diak iha prosesu konstrusaun Estadu nian, atu kuda kultura diak ba oin iha prosesu tranzisaun jerasional nian,”dehan Branco.

Iha biban seluk, Prezidenti bankada CNRT Arão Noe argumenta, líder partidu CNRT obrigatoriu bolu líder partidu nainrua tenke halo deklarasaun iha estranjeiru hodi responde situasaun polítika rai laran, tanba okupadu ho misaun negosiasaun atu muda pipeline mai Timor-Leste.

“Ita hatene katak maun bo’ot hala’o hela nia misaun ida, halo hela negosiasaun atu dada pipeline mai Timor, iha Singapura mós halo hela negosiasaun ida, tanba ne’e mak maun bo’ot labele mai, nia kontaktu de’it Prezidenti PLP ho konselleiru másimu KHUNTO nian mak ba tan de’it hodi hasoru malu, ne’e normal no la viola buat ruma, direitu ba ema atu interpreta saída de’it, maibe partidu nia pozisaun klaru,”haktuir Arão.

Relasiona ho argumentu refere, chefi bankada Fretilin hateten, negosiasaun hotu iha nia tempu, la’os fulan-fulan de’it, nia (Branco) konsidera ne’e lójika.

Entretantu líder bankada CNRT Arão Noe informa tan, objetivu husi deklrasaun líder partidu nian ne’e, hanesan esplikasaun ka mensajen ida ba públiku katak, aktu ne’ebé bankada sira hala’o iha parlamentu ne’e ho koñesimentu no autorizasaun husi líder másimu partidu tolu nian.

Nia afirma tan, objetivu hasoru malu entre líder tolu ne’e mós atu assina ofisial akordu ne’ebé partidu tolu halo ona hodi halo konferensia, hodi nune’e públiku bele hatene katak líder partidu tolu ne’e mak assina ho kompromisu katak hahú 2017 to’o 2022 partidu tolu sei la’o hamutuk hanesan AMP hodi hasoru situasaun saída de’it, tantu governasaun no eleisaun antesipada.

Relasiona ho deklarasaun partidu koligasaun nian kona-ba pozisaun AMP ne’e nia prosesu ba oin, Arão Noe, hateten, ne’e interpretasaun ema ida-idak nian, maibe Tribunal mak bele deside loloos tuir legalidade.

Alende ne’e, deputadu Natalino dos Santos husi bankada CNRT hateten, enkontru lideransa nain tolu ne’e, hatudu ba públiku katak, ezistensia AMP la’os illegal.say/cos


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker