Prezidenti partidu CNRT, Kay Rala Xanana Gusmão, seidauk iha serteja atu fila mai Timor Leste (TL) iha fulan Novembru ne’e nia laran, tanba negosiador prinsipal ba asuntu fronteira marítima ne’e, okupadu ho servisu seluk iha estranjeiru.
Vise Prezidenti partidu CNRT, Virgílio Smith informa, Kay Rala Xanana Gusmão iha estranjeiru la’os trata de’it asuntu fronteira marítima, maibé hala’o mós servisu seluk ne’ebé nasaun Timor Leste presiza.
“Tuir ajenda ne’ebé mak Prezidenti Partidu CNRT, Kay Rala Xanana Gusmão hala’o hela iha estranjeiru sei fulan ida tan, ami mós seidauk iha serteja katak, fulan Novembru ne’e nia sei to’o fali iha Timor Leste,” katak Virgílio Smith ba jornalista sira iha sede nasional CNRT Dili, Domingu (05/11).
“Ami la akompaña lolos kna’ar ne’ebé mak nia hala’o iha estranjeiru, maibé ami hatene katak, maun Kay Rala Xanana Gusmão dadaun ne’e hala’o hela servisu. Ami nia kontaktu liu husi Sekretáriu Jeral, informasaun hotu ami simu husi Sekretáriu Jeral,” katak Virgílio.
Virgílio esklarese, segundu konferensia nasional partidu CNRT nian ne’e, hetan orientasaun no koñesimentu husi Kay Rala Xanana Gusmão hanesan Prezidenti partidu.
“Ami iha mandatu, tanba ita hatene katak, to’o ohin loron atu revoga rezolusaun ida primeiru konferensia CNRT nian, maun bo’ot Xanana Gusmão assume nafatin nia kna’ar hanesan Prezidenti Partidu, maibé sem plenus poderes, tanba ne’e mak durante periodu ida ne’e, CPN no CDN mak forma lideransa partidu nian, tanba Prezidenti partidu sem plenus poderes,” relata Virgílio Smith.
Maibé liu husi segundu konferensia ne’e, CPN no CDN hasai ona desizaun kolektiva ida ho koñesimentu Prezidenti Partidu CNRT nian katak, hodi revoga rezolusaun ne’ebé hasai iha primeiru konferensia nian, hodi atribui fali poder ba Prezidenti partidu CNRT, Kay Rala Xanana Gusmão.
Virgílio dehan, segundu konferensia nasional partidu CNRT nian ne’e, hala’o tuir estatutu partidu nian rasik, la’os tanba situasaun polítika iha rai laran.cos
