GMN TV Politika PR sei interpreta Kontituisaun tuir interese Estadu

PR sei interpreta Kontituisaun tuir interese Estadu

0 views

Prezidente Repúblika (PR) Francisco Guterres ‘Lú Olo’ promete iha nia diskursu katak, sei interpreta artigu sira Konstituisaun Repúblika Demokratika Timor-Leste (K-RDTL) tuir regra no sei la haliis ba partidu ruma, hodi tau aas interese Estadu nian.

Diskursu PR Lú Olo nian ne’e lee sai husi Ministru Saúde, Rui Maria de Araújo iha komemorasaun loron proklamasaun independensia ba dala 42 iha Munisípiu Dili, Tersa (28/11/2017).

“Ita hotu tenke respeia baliza konstitusional sira, konstitusinalista Portugues ida hateten, iha Estadu demokratíku sira,  konstituisaun mak hatudu dalan no identifika ho aplitude luan tebes no distinu koletivu ida. Tanba ne’e, ita hotu tenke haraik-an no hatudu respeitu bainhira temi konstituisaun, ita temi konstituisaun atu defende lei inan ne’e, nu’udar mata dalan ba Estadu no povu, atu kaer metin pátria nu’udar ita-nia distinu koletivu, konstituisaun nu’udar lei inan halibur ita ema, ita labele temi konstituisaun nar-naran de’it tuir ida-idak nia interese no ita labele uza konstituisaun atu fahe ema,  konstituisaun iha normas, valores, prinsipius, no objetivu ne’ebé ita hotu tenke fo importánsia no defende, ladiak bainhira iha tentativa atu interpreta konstituisaun tuir ida-idak nia interese, ha’u kompriende tentativa sira ne’e, maibe nu’udar Prezidente Repúblika, ha’u tenke interpreta loloos sentidu husi artigu konstituisaun nian tuir regras, hodi servi interese Estadu nian, ha’u labele haliis ba interese partidu ne’ebé iha Governu ka opozisaun, kontituisaun ne’e testu kompletu ida, ita labele interpreta ketak-ketak artigu konstituisaun nian,”dehan Rui Araújo, hodi haktuir ba diskursu PR nian.

Iha diskursu nia laran mós Xefi Estadu husu interpreta nain sira konstituisaun RDTL nian,  atu interpreta artigu sira ne’ebé aplika ba sistema polítiku, hamutuk ho artigu sira ne’ebé refere ba dezenvolvimentu nasional ho propriasaun kbiit laek sira nian.

“Tenke Luta hasoru kiak ho artigu relevante sira seluk, ida ne’e mak ha’u halo hela, no ha’u sei halo nafatin, observador internasional sira konsidera, sistema polítiku Timor-Leste nian,  nu’udar ezemplu diak ida, iha ita-nia ukun an ida ne’e, ita la’os harí de’it sistema polítiku, ita harí mós mákina Estadu ida ne’ebé hato’o dadadun ona servisu públiku,  inklui  edukasaun, saúde,  seguransa ba sidadaun sira, no infra-estrutura estratéjiku importante balun, atu ita bele hala’o ita-nia projetus dezenvolvimentu, ita aprova no implementa ona polítika solidariedade tuir grupu kbi’it laek sira, ho nune’e kontribui atu ema hotu-hotu respeita no tane aas sira-nia dignidade, maske ita hetan susesu sira ne’e, maibe ita mós tenke rekoñese katak, iha área balun kualidade servisu seidauk diak,”haktuir diskursu PR Lu-Olo nian.

Iha diskursu ne’e mós Xefe Estadu RDTL hateten, garante estabilidade interna no externa mak sai sasukat susesu iha independensia nian.

“Sasukat ida ba independensia mak susesu,  iha maturidade polítika ba ukun nain no povu nian, susesu ne’ebé ita hetan iha ita-nia prosesu paz no rekonsiliasaun interna no externa, se laiha estabilidade, sei la iha mós dezevolvimentu. Ita-nia povu tomak hatudu ona katak, sira hakarak mak paz hodi servisu lorloron, hodi haforsa estabilidade hodi fo dalan ba dezenvolvimentu nasionál,”haktuir diskursu PR Lú Olo nian ne’e.

PR Lú Olo husu ba responsável polítiku hotu- presija tau atensaun ba aspetu hotu ne’ebé mak iha ligasaun ho konstituisaun.

“Tuir artigu oin-oin konstituisaun RDTL nian, Estadu tenke harí kondisaun sira ne’ebé presija, atu sidadaun hotu-hotu bele moris diak ho dignidade, bainhira ita ko’alia konaba konstituisaun, ita tenke ko’alia mós ba dever ida ne’e, ita manan luta, maibe ita nia independensia ne’e, fo mós responsável ba Prezidente repúblika, ministru no deputadu sira, lideres partidu polítiku sira nian, no governu, atu hatan ba necessidade povu nian, no oinsa uja kbi’it sira ne’e hodi foti as nafatin espiritu nasionalista ne’ebé kesi metin Timor oan sira iha tinan 1975 no haforsa liutan durante ita nia luta, ita manan independeinsia atu hatan ba povu iha Estadu nia fuan, atu ita hotu tau matan ba povu tomak ba moris diak, nu’udar przidente repúblika, hau respeita ema hotu-hotu, partidu sira no organizsaun hotu-hotu sosiedade sivil nian, maibe hau nia hahalok no inisiativa sei serve de’it povu no sei hakru’uk de’it ba konstituisaun RDTL,”iha diskurusu PR ne’e.

Liu husi diskursu ne’e, Xefi Estadu mós ekoraja líder parte hotu, atu servisu maka’as hodi hatudu ba mundu katak Estadu Timor-Leste nia prioridade mak harí no hadia povu nia moris no tane aas povu hotu.

Prezidente Repúblika, Francisco Guterres ‘Lú Olo’ rasik mai husi Partidu FRETILIN, tamba ne’e públiku kestiona ho konstelasaun polítika ne’ebé la’o iha rai laran, PR Lú Olo bele foti desizaun la tuir ema barak nia hakarak, maske PR Lú Olo iha nia kampaña liu ba hatete katak, nia sai PR ba povu tomak.Say


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker