GMN TV Politika Taur: Programa no orsamentu laliu, Governu monu "Xanana orienta AMP rona Taur"

Taur: Programa no orsamentu laliu, Governu monu "Xanana orienta AMP rona Taur"

0 views

Prezidente Partidu Libertasaun Popular (PLP), Taur Matan Ruak, informa, VII Governu ne’ebé forma minoria husi FRETILIN no Partidu Demokratiku (PD) iha risku boot, tamba programa ho orsamentu la liu iha Parlamentu Nasional, Governu monu.

Bankada koligasaun parlamentar FRETILIN no PD iha kadeira 30 no bankada opozisaun ne’ebé forma Aliansa Maioria Parlamentar husi Partidu tolu hanesan CNRT, PLP no KHUNTO iha kadeira 35.

“Eleisaun parlamentar foin dadauk ne’e laiha partidu ida mak hetan maioria, tanba ne’e partidu hotu hakarak ukun, nia tenke halo ezersisiu bo’ot ida, diálogu no negosia para bele hetan buat ne’ebé tuir konstituisaun haruka katak, maioria parlamentar Partidu mais votadu signifika ne’e halo eskaloñamentu para eskolla, se mak uluk no se mak tuir. Maibe kuandu ba ukun, nia kriteriu ida mesak, mak maioria parlamentar, kuandu la hetan ida ne’e sei iha risku bo’ot ba programa no orsamentu la liu,  Governu bele monu no hamosu governu foun,”esplika Taur.

Tuir Taur Matan Ruak, ezistensia Partidu Polítiku (ParPol) iha nasaun ida tuir konstituisaun no laiha partidu ida mak lakohi atu ba ukun.

 “Ezistensia partidu hotu atu kaer ukun, no laiha partidu ida maka lakohi ukun, hodi implementa hanoin  no programa ne’ebé diak ba povu nia moris. Partidu hotu-hotu moris atu ukun, se mak dehan lae ne’e, bosok. Hakarak ukun tanba  ita hanoin, vizaun ba povu nia moris diak, no atu implementa programa no kontribui ba dezenvolvimentu nasaun nian, maske partidu ida kiik no foun, tanba  ita hakarak fo mós ita-nia kontribuisaun, ne’e mak ita hamosu partidu, partidu iha dalan rua atu ukun, ida partidu kuandu hetan fiar maioria iha eleisaun, hodi ukun mesak, no ida seluk koligasaun,”hateten Prezidente PLP, Taur Matan Ruak, iha konferensia nasional PLP nian hodi reforsa plataforma bloku opozisaun ne’ebé hala’o iha Hotel Novo Turismo Dili, Sábadu (11/11/2017).

Nia rekoñese, bloku ne’e mosu tanba prezensa KHUNTO nian iha opozisaun no sai husi koligasaun.

Iha fatin hanesan, konselleiru partidu KHUNTO, José dos Santos ‘Naimori’ reforsa, partidu hotu luta, la’os tan kadeira, maibe ba interese povu nia moris.

“Ema hotu gosta harii partidu, maibe mai hosi ita-nia lideransa sira, ita hotu-hotu nia luta, la’os tan kadeira, maibe ita-nia atu servi ba povu no nasaun, tanba ne’e mak partidu bele barak maibe hanoin ida de’it oinsa mak nasaun ne’e bele ba oin. Tanba ne’e ita hotu tenke kria kondisaun diak, kria estabilidade no dame para hetan unidade nasional, hodi ita hotu halai ba dezenvolvimentu ba povu nia moris diak, tanba ne’e  ita labele husik maun bo’ot Xanana no Taur mesak, hodi ema hamnasa sira, tanba uluk sira mak hakilar no kontinua luta ba moris diak,”dehan Naimori.

Enkuantu Sekretariu Jeral Partidu CNRT, Francisco Klabuadi Lay, tranzmite, Prezidente Partidu CNRT, Kay Rala Xanana Gusmão, husu estrutura hotu tenke simu orientasaun husi líder PLP Taur Matan Ruak.

“Tanba durante ne’e Maun bo’ot Xanana hala’o hela servisu iha liur, orienta ha’u atu hato’o mensajen katak, ita hotu-hotu tenke simu orientasaun husi maun Taur,  ha’u iha kontaktu ho Maun Bo’ot Xanana ne’ebé hato’o hakuak bo’ot ba ita hotu liu-liu ba nia alin Taur Matan Ruak. Ita mai konferensia atu reforsa de’it bloku AMP nian servisu, kria amizade ida ne’e la’os iha nasional de’it, maibe to’o iha baze, tenke iha konfiansa no amizade ida ne’e, para ita bele hamutuk hodi haree, liu-liu atu kria estabilidade, dame no paz ba ita-nia rai,”haktuir Kalbuady.

Enkuantu Sekretáriu Jeral CNRT ne’e afirma tan, hahú agora ba oin, partidu CNRT, PLP no KHUNTO la’os ona tolu, maibe ida de’it iha orientasaun polítika.

Tuir konstituisaun RDTL artigu 86 Kompeténsia Prezidente Repúblika nian kona-ba órgaun sira seluk, iha alinea f) hatete katak, Hakotu Parlamentu Nasionál, iha kazu krize boot institusionál nian ne’ebé labele iha formasaun governu ka aprovasaun Orsamentu Jerál Estadu nian, iha tempu naruk liu loron neen-nulu, wainhira rona tiha ona partidu polítiku sira-ne’ebé hetan kadeira iha Parlementu Nasionál, no rona Konsellu-Estadu, iha tempu ne’ebé laiha kdasar jurídiku atu hala’o disolusaun, tenke haree tuir regra iha Artigu 100; no alinea g) Hatún Governu no exonera Primeiru-Ministru nian, wainhira Parlamentu Nasionál la simu nia programa dala rua tutuir malu.

Iha fali artigu 109 (Apresiasaun ba Governu nia Programa) iha numeru 1. Programa Governu nian sei hato’o ba Parlamentu Nasionál atu hetan apresiasaun, no Parlamentu la funsionál karik, tenki konvida ka konvoka sira ba asuntu ida-ne'e. Iha númeru 2. Debate programa Governu nian labele liu loron lima, no to’o remata, grupu ida-idak iha Parlamentu bele husu atu lasimu, eh Governu bele husu votu konfiansa ida. Iha númeru 3. Atu lasimu programa Governu nian, tenke iha apoiu mai husi maioria deputadu husi sira- ne’ebé sei hala’o hela knaar.

VII Governu aprezenta uluk Orsamentu Retifikativu (OR) ba Parlamentu Nasional atu viabiliza, maibe programa daruak seidauk. Tamba ne’e, bankada opozisaun maioria parlamentar la konkorda ho aktu ne’e, tanba opozisaun sira iha dadus katak, osan sei iha atu sustentabiliza Estadu ba fulan rua ou tolu nia laran no la presiza husu tan osan, no mós opozisaun sira prefere liu  Governu hatama mak programa ba daruak nian. Maibe VII Governu mantein ho sira-nia polítika hakarak hatama uluk OR mak programa.

Programa VII Governu dahuluk ne’ebé aprezenta hetan sumba iha Parlamentu Nasional tamba bankada opozisaun halo mosaun rejeisaun, nune’e mosaun rejeisaun ne’e  pasa ho votus a favor 35, kontra 30 no abstensaun 0.Say


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker