GMN TV Politika Xanana, Taur- Naimori ofisialija ezistensia AMP "Husu ba povu hakmatek"

Xanana, Taur- Naimori ofisialija ezistensia AMP "Husu ba povu hakmatek"

0 views

Prezidenti Partidu CNRT, Kay Rala Xanana Gusmão, Prezidenti Partidu Libertasaun Popular (PLP) Taur Matan Ruak, no Konseleiru Superior KHUNTO, José dos Santos ‘Naimori’ hasoru malu iha Singapore hodi fortifika no ofisialija plataforma polítika Aliansa Maioria Parlamentar (AMP), ne’ebé forma ona iha Parlamentu Nasional (PN), hodi hasoru kualker situasaun polítika ne’ebé sei akontese.

Kay Rala Xanana Gusmão ne’ebé akompaña husi Taur Matan Ruak no Naimori hateten, AMP prontu atu servi povu hodi respeita konstituisaun.

“Ami hakarak fó mensajen ida ba povu tomak, mensajen konfiansa, mensajen hakmatek nian, tanba depois rona tiha direjentes, partidus PLP no KHUNTO nian iha ita nia rai laran, ami hotu senti obrigasaun bo’ot, atu responde ba interese nasaun nian. Ohin (horiseik), ami haree fila fali akordu polítiku entre partidu tolu ne’ebé ami asina tiha ona loron hira liu ba,” katak Xanana iha konferensia imprensa ne’ebé hala’o iha Singapore Tersa (21/11).

Xanana Gusmão lori partidu tolu (CNRT, PLP no KHUNTO), ne’e nia laran, husu ba Prezidenti Repúblika, Francisco Guterres ‘Lu-Olo’, no sauda instituisoens Estadu tomak hodi afirma katak, partidu tolu ne’ebé halo ona sira nia konferensia ida-ida hodi harii AMP, ho objetivu atu pronto servi povu TL.

“Atu dehan de’it katak, ami pronto atu responde ba situasaun difisil ne’ebé mosu dadauk. Ami la fó kulpa ba ema ida, nu’udar partidu polítikus, maibé ami senti responsabilidade bo’ot katak, tenki prepara-an atu bele fó dalan diak ida hodi hasai povu husi krize polítika ida ne’e,” relata Xanana.

Prezidenti CNRT ne’e esklarese, Prezidenti Repúblika, Francisco Guterres ‘Lu-Olo’ hakerek karta ida ba nia, hodi hateten katak, situasaun polítika iha rai laran ne’e, iha aspeitu pozitivu bo’ot ida, tanba sosiedade komesa diskuti konstituisaun, no komesa kompriende prosesu konstrusaun Estadu Timor Leste.

Xanana haktuir, Taur Matan Ruak ho Naimori mós konkorda ho afirmasaun Prezidenti Repúblika Lu-Olo nian ne’e, tanba situasaun hanesan ne’e mak lori povu Timor Leste kompriende diak liu tan prosesu konstrusaun Estadu, no konstrusaun nasaun.

“Ami nain 3 senti katak, dalan atu rezolve situasaun ida ne’e, iha Prezidenti Repúblika, Francisco Guterres ‘Lu-Olo’ nia liman. Ami espera Prezidenti Repúblika sei kumpri konstituisaun no ami sei fó apoiu tomak, tanba konstituisaun mak garante vida Estadu tomak, no vida nasaun tomak,” tenik Xanana.

Tanba ne’e, Xanana husu ba povu tomak atu lalika laran taridu no lalika preokupa, tanba iha difikuldades hanesan ne’e, mak ema hotu bele tau hamutuk hanoin ba futuru nasaun.

“Dalaruma ema bele husu, nusa mak Xanana ho Taur hirus malu tiha, agora hakuak malu. Nu’udar humanu, itan hotu iha ita nia komportamentu sira lor-loron nian hahú husi uma laran, viziñu ka iha Suku ida-ida. Maibé kuandu interese nasional mosu, ami nain rua haree katak,  buat ida entre ami nain rua, ki’ik demais,”afirma Xanana.

Tanba ne’e, Xanana, Taur no Naimori iha kompromisiu ida katak, sira nain tolu sei bele lori kna’ar ne’ebé karik Estadu bolu.

“Husu bo’ot ba povu atu hakmatek hanesan ohin loron, ha’u kontenti tebes bainhira Prezidenti PLP, ho Konseleiru KHUNTO mai fó hatene mai ha’u katak, povu tomak hakmatek. Kapas, ita tuir maturidade polítika ida ne’e, ita hatudu ita iha kbi’it atu lori ita nia Estadu ne’e ba oin,” katak Xanana.

Nia esklarese, iha sorumutu ho Taur Matan Ruak no Naimori ne’e, sira la ko’alia buat barak, maibé ko’alia hanesan Bloku ida ne’ebé tenki prepara-an atu responde ba situasaun ne’ebé bele mosu iha AMP nia liman.

“Ami pronto, fiar ba katak AMP pronto, no fiar ba katak, AMP sei la obriga ema ida, li-liu sei la obriga Prezidenti Repúblika, atu fó atu viola konstituisaun, ne’e ami nia kompromisu ne’ebé bo’ot tebes,” katak Xanana.

Nia afirma, kuandu AMP hetan konfiansa polítika, povu bele fiar katak, AMP sei hala’o sira nia responsabilidade hodi servi nasaun no povu, no hametin Estadu.

Xanana dehan, nia hato’o mensajen ne’e hodi halakon tiha espekulasaun oi-oin ne’ebé hateten katak, partidu tolu ne’e (CNRT, PLP no KHUNTO) mak tenta kria situasaun hanesan ne’e.

“Ohin ami nain tolu fó hatene ba povu tomak katak, ami sei simu ho responsabilidade tomak saida de’it, atu servi ho diak, ida ne’e mak ami nia kompromisu,” katak Xanana.cos


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker