Xefi bankada partidu Congresso Nacional de Reconstrução de Timor (CNRT), iha uma fukun Parlamentu Nasional (PN), Duarte Nunes, garante, Prezidente Repúblika (PR), Francisco Guterres ‘Lú Olo’ mós iha sentidu Estadu ba Orsamentu Jeral Estadu (OJE) 2019 ne’ebé sei sustentabiliza mákina Estadu, ne’ebé fiar katak PR sei tetu di-diak hodi la veta OJE.
“Orsamentu ne’e ba povu tomak ninian, sé ba Porta voz Aliansa Maioria Parlamentar (AMP) de’it, ami fiar katak pasti to’o iha ne’ebá dalaruma tau tama ba lixu, mas ne’e ba povu tomak nia moris, ne’ebé PR sei tetu, ne’e la’os ba ami de’it, maibé ba ita hotu, ne’ebé ba situasaun sira ne’ebé dehan PR sei veta OJE 2019, ne’e ha’u hanoin nia iha sentidu Estadu no nia sei tetu situasaun ne’ebé afeta ema barak”,Duarte Nunes ba jornalista sira iha ninia kna’ar fatin bankada CNRT, Parlamentu Nasional (PN) Kinta (15-11-2018).
Nia esplika, AMP la senti presaun hafoin kansela viajen PR Lú Olo, tanba nuudar deputadu halo kna’ar tuir buat ne’ebé maka tenki halo no tuir orientasaun polítika, tanba hanesan deputadu kumpri obrigasaun, ne’ebé atu veta ka promulga OJE ne’ebé Governu propoin, entrega ba PR nia liman.
“Ami la senti presaun katak abanbainrua PR veta OJE 2019, ha’u ohin koalia ona, ne’e la’os ba ami de’it, maibé ba ema barak, F-FDTL, PNTL no selu-seluk tan. Durante tinan 2 nia laran ne’e, ami haree katak kuandu ita uza orsamentu duodésimu, buat hotu paradu, entaun ita espera katak sei laiha intensaun atu hapara, maibé buat hotu fila-fali ba PR nia desizaun”, haktuir Porta Voz AMP ne’e.
Nia akresenta, PR Lú Olo, Primeriu Ministru (PM), Taur Matan Ruak, Xanana Gusmão no Lere Anan Timur ema hirak ne’ebé mai husi ai-laran, ne’ebé espera katak ba oin situasaun ne’e sei iha solusaun ruma.
“Ha’u la tauk buat ida, ha’u ho konsiensia katak, ha’u hanesan deputadu, ne’e partidu ida nian ema, nune’e ha’u tenki rona orientasaun husi partidu no rona mós lideransa AMP nian. Kuandu akontese PR veta OJE 2019, ami sei hola pozisaun ruma, mas seidauk akontese ita labele imajina lai, ha’u hanoin ne’e la diak, husik ba akontese, rai ne’e ki’ik oan, PN hanesan orgaun soberanu ida, sei hatene ninia pozisaun iha ne’ebé”,relata Porta Voz AMP ne’e.
Entretantu antes ne’e, Reitor Universidade da Paz (UNPAZ), Lucas da Costa, hateten, OJE 2018 la ezekuta hotu iha tinan ida ne’e, hatudu katak VIII Governu nia dezempeñu la diak, nune’e sei fó razaun ba PR Lú Olo atu veta OJE 2019 ho montante billiaun US$ 1.827, tanba VIII Governu laiha kapasidade atu ezekuta OJE 2018 to’o remata.
Enkuantu proposta OJE 2019 ne’ebé Governu haruka ona ba PN atu hetan apresiasaun molok ajenda ba diskusaun no votasaun hamutuk billlaun US$ 1. 827.ves
