Bankada Aliansa Maioria Parlamentar (AMP), husu ba Prezidente Parlamentu Nasional (PPN), Arão Noe, atu re-ajenda fali diskusaun viajen Prezidente Repúblika (PR), Francisco Guterres ‘Lú Olo’ ba Vatikanu-Roma.
“Ikus mai ami hetan informasaun husi Konsellu AMP katak, iha ona mudansa pozisaun kona-bá sentimentu viajen PR nian ba Roma, tan ne’e ami husu PPN no husu mós konfirmasaun ba bankada AMP ninian, atu pronunsia, para depois amenta iha ajenda ohin (horiseik-red), tanba sé ita haree PR nia vizita ne’e marka ba iha dia 17 Novembru no audensia ne’e iha dia 20 i tal ho Santo Padre, ne’ebé ami hanoin tempu sei iha, nune’e ami husu PPN atu konsidera ami nia sujestaun ne’e”,Xefi bankada CNRT, Duarte Nunes liu husi ninia deklarasaun polítika, iha uma fukun Parlamentu Nasional (PN), Tersa (13-11-2018).
Nia esplika, razaun AMP hakarak tau ajenda diskusaun viajen PR Lú Olo ba ohin (horiseik-red) loron, iha momentu halo votasaun ba PR nia planu viajen ba Vatikanu, lideransa AMP seidauk konsulta malu ho diak, tanba AMP la’os partidu ida de’it, maibé partidu tolu, ne’ebé ninia lideransa sira mós presiza konsulta malu.
Tuir Xefi bankada FRETILIN, Aniceto Guterres, afirma, sé konsege re-ajenda fali hodi halo diskusaun, partidu FRETILIN promete sei walkout husi plenária.
“Sé ita boot sira konsulta tiha ona ho PR ne’e buat seluk ida, sé ita iha ne’e muda desizaun, sé PR rezeita, ne’e halo nusa, tanba ne’e PPN enkuantu pedidu iha, FRETILIN nia pozisaun maka ne’e, labele ajenda no ita labele hola desizaun seluk, a não ser que iha pedidu, sé ita boot sira hakarak uza maioria maka tau iha ajenda bankada FRETILIN sai husi plenaria”,realsa Aniceto Guterres.
Maibé tuir deputadu bankada FRETILIN, David Dias Ximenes ‘Mandati’, sujere ba PPN, tenki konsulta uluk lai ho Xefe Estadu, molok re-ajenda viajen ba Vatikanu, atu labele hamosu konfuzaun.
“Ha’u hanoin katak ita atu foti desizaun ne’e, hanoin tiha lai, tanba ne’e ha’u nia hanoin PPN iha ninia influensia rasik ba koalia ho PR, bele ka la’e, maka ita halo desizaun ba, para labele ita maka hanesan fali ping pong ne’ebé ema baku tún no sa’e, maibé ita iha PN ne’e ema ne’ebé ho personalidade rasik”,haktuir Mandati.
Husi sorin seluk, Xefi bankada UDT, Gilman Exposto, sekunda mós, atu PPN halo enkontru ho PR Lú Olo, hodi hetan desizaun ida ne’ebé diak, hodi aprova iha plenária.
Entretantu PPN, Arão Noe, informa ona ba tékniku meza PN, atu halo karta ba PR, Francisco Guterres ‘Lú Olo’, hodi halo konfirmasaun ba planu PN, hakarak re-ajenda fali diskusaun viajen PR ba Vatikanu, ne’ebé sei halo iha loron 23, fulan ne’e.
Antes ne’e Parlamentu Nasional kansela viajen Prezidente Repúblika, Francisco Guterres Lú Olo, ba Vatikanu ho votus kontra 35, afavor 26 no abstensaun zero (0).
PR nia viajen kansela ba dala-4 ona, hanesan ba América, Portugal, Indonesia no Vatikanu-Roma. ves
