Xefi bankada Congresso Nacional de Reconctrução de Timor (CNRT), Duarte Nunes, hateten, to’o agora koligasaun Aliansa Maioria Parlamentar (AMP), seidauk hetan informasaun, dehan sei mosu remodelasaun iha estrutura VIII Governu.
Maibé iha loron 28 Novembru ne’e, wainhira partisipa iha komemorasaun proklamasaun Timor-Leste ninia independensia ba dala-43, Primeiru Ministru (PM), Taur Matan Ruak, deklara ona katak, iha posibilidade atu halo remodelasaun ba estrutura VIII Governu.
“Ha’u seidauk rona informasaun dehan sei mosu remodelasaun iha estrutura VIII Governu, maibé ha’u hanoin PM maka iha kompetensia tomak, atu halo remodelasun, tanba Governu ne’e iha ninia kontrolu, nia maka hatene, presiza atu halo mudansa ruma nia maka hatene, la’os Parlamentu Nasionál (PN), maibé Governu no PM maka sei haree, iha nesesidade duni atu halo mudansa ruma nia maka hatene”, Xefi bankada CNRT ne’e ba jornalista sira iha resintu uma fukun PN, Kinta (29-11-2018).
Nia esplika, bele mós tuir PM nia haree karik diak ba funsionamentu VIII Governu nian maka koalia hanesan ne’e, maibé AMP iha PN suporta nafatin atu VIII Governu bele la’o diak no halo dezenvolvimentu durante tinan lima (5).
“Agora durante tinan 5 ne’e maka nia hanoin presiza iha mudansa, nia maka hatene, depois nia sei enkontru ho ami para esplika, maibé to’o agora seidauk iha diskusaun kona-bá situasaun ida ne’e. Sé iha posibilidade iha remodelasaun, ha’u nuudar parte komponente ida husi AMP, ami apoiu”, haktuir Duarte Nunes.
Nia afirma, sei mosu mudansa iha estrutura VIII Governu, ne’e la’os atu sobu unidade AMP, maibé mudansa para hametin liu tan.
“Ate agora ami seidauk iha diskusaun ruma kona-bá atu halo mudansa ba iha estrutura Governu”, hateten Xefi bankada CNRT ne’e.
Husi sorin seluk, deputadu bankada Kmanek Haburas Unidade Nasionál Timor-Oan (KHUNTO), Antonio Nobre, informa, loos duni wainhira haree ba impase polítika kona-bá membru Governu ne’ebé maka seidauk kompletu, bele akontese remodelasaun, maibé to’o agora KHUNTO seidauk asesu informasaun ida dehan, sei mosu remodelasaun iha VIII Governu.
“Governu bele akontese remodelasaun, haree ba situasaun polítika ne’ebé maka la’o, maibé to’o agora ami seidauk iha informasaun ruma parte koligasaun AMP nian atu túr hamutuk atu desidi. Ami AMP metin, portanto ho tan kompozisaun 36 kadeira, ne’ebé UDT/FM mai tan, depois ita halo AMP, Governu la nakdoko enkuantu PN forti hela, tanba Governu mai husi PN, ne’ebé enkuantu PN forti, Governu AMP la nakdoko”, dehan Xefi bankada KHUNTO ne’e.
Entretantu membru VIII Governu ne’ebé seidauk simu posse maka hanesan, Helder Lopes, Sérgio Lobo, Tómas Cabral, Virgílio Smith, António Verdial, Francisco Kalbuadi Lay, Jacinto Rigoberto, Amandio Benevides no Alfredo Pires. ves
