Prezidente Parlamentu Nasional (PN), Arão Noe, deklara katak, esforsu ne’ebe mak PN halo konsege Eis Deputadu III lejislatura nain rua (2) entrega ona kareta prado, nain 30 resin mak seidauk entrega kareta refere.
“Eis deputadu CNRT nain rua maka entrega, restu seidauk entrega, tanba ne’e maka PN kontinua esforsu negosia ho eis deputadu III lejislatura sira, sé konsege entrega hotu antes sosa, ami bele kansela, sé seidauk entrega hotu PN desidi tenki sosa. Ami labele hein to’o eis deputadu III lejislatura sira entrega hotu, para husik hela deputadu sira ne’ebé laiha kareta la’o ain ou sa’e taxi mai servisu, tanba ne’e maka PN liu husi plenaria desidi hola kareta foun ba deputadu sira ne’ebé eleitu foun ba V lejislatura, maibé ba deputadu III lejislatura ne’ebé re-eleitu, uza nafatin kareta prado antigu tuir mandatu, agora kona-bá kareta sira seluk prosesu sei la’o hela,” afirma Prezidente PN, ba jornalista sira iha resintu uma fukun PN, semana kotuk.
Durante ne’e PN halo esforsu lubuk atu dada hikas kareta refere atu deputadu V lejislatura bele uza hala’o servisu.
“Esforsu halo tiha ona durante fulan hát (4), dezde kuandu ha’u toma pose, ami foti tiha ona desizaun hasai karta tolu (3) ba eis deputadu III lejislatura, haruka mós karta ba partidu polítiku sira para atu bele koopera di-diak hodi devolve kareta sira ne’e, atu nune’e PN V lejislatura bele uza,” informa Arão Noe.
Entretantu iha diskusaun orsamentu privativu PN ninian, deputadu sira konkorda sosa kareta foun ba deputadu V lejislatura hamutuk 48, proposta sosa kareta ne’e pasa ho votus a favor 14, kontra 13 no abstensaun 11. ves
