Prezidente Parlamentu Nasional (PN), Arão Noe, rekoñese, relasiona ho membru VIII Governu ne’ebé seidauk kompletu, sei fó impaktu boot ba prosesu diskusaun to’o ezekusaun Orsamentu Jeral Estadu (OJE) 2019, tanba laiha Ministru ida maka atu halo ezekusaun.
“Ba Ministru Negósiu Estranjeiru no Kooperasaun (MNEK), Dionísio Babo Soares ninia saúde ladún diak, ida ne’e fatin mamuk hela, tanba Vise Ministru seidauk iha no ministériu tolu seluk ne’ebé importante teb-tebes, sem Ministru durante fulan 4 ona, ha’u hanoin katak iha impaktu boot ba ezekusaun orsamentu no iha faze debate orsamentu”,Prezidente PN ba jornalista sira iha resintu uma fukun PN, Kuarta (14-11-2018).
Nia akresenta, agora sé membru Governu la kompletu audiénsia ho kada komisaun mós sei difisil nafatin, liu-liu iha ministériu sira ne’ebé mak ministru seidauk iha, hanesan Ministériu Saúde (MS) no Ministériu Finansa (MF).
Husi sorin seluk, Xefi bankada partidu Congresso Nacional de Reconstrução de Timor (CNRT), Duarte Nunes, hateten, asuntu membru Governu nain sia (9), ne’ebé seidauk simu pose ne’e kompetensia Primeiru Ministru (PM), Taur Matan Ruak ninian.
“Tuir diskusaun ne’ebé AMP iha, ida ne’e ami entrega ba PM maka halo kontaktu ho PR Lú Olo, ami la adianta tanba ne’e kna’ar PM ninian, nia maka sei koalia PR atu hetan solusaun”,informa Duarte Nunes.
Entretantu membru VIII Governu hirak ne’ebé seidauk simu pose husi PR Lú Olo mak hanesan Helder Lopes, Sérgio Lobo, Tomas Cabral, Virgílio Smith, António Verdial, Francisco Kalbuadi Lay, Jacinto Rigoberto, Amandio Benevides no Alfredo Pires.ves
