Vise Ministra Finansa, Sara Lobo Brites, hateten, ezekusaun Orsamentu Jeral Estadu tinan 2018 nian la’o diak, maske tempu ezekusaun ne’e limitadu tebes.
“Ezekusaun OJE tinan 2018 la’o tuir ritmu ne’ebé mak diak, ita espera katak, to’o fim do ano ita bele ezekuta to’o orsamentu ne’ebé mak aloka”, relata Sara Lobo Brites ba jornalista sira iha Parlamentu Nasional, Kinta (08/11), hafoin entrega proposta OJE 2019.
Ministra Interina Finanasa ne’e esklarese, nia sei fó sai rezultadu ezekusaun OJE 2018 iha tempu badak hodi públiku bele hatene.
“Ha’u la lori ninia presentajen, maibé ha’u bele fó ba imi (jornalista) iha loron hira tuir mai”, relata Sara Lobo Brites.
Antes ne’e, Primeiru Ministru, Taur Matan Ruak, mós rekoñese katak, ezekusaun Orsamentu Jeral Estadu 2018 seidauk másimu, tanba orsamentu ne’e aprova ba fulan haat, maibé ezekuta ba fulan tolu de’it.
Xefi Governu ne’e hatutan, ezekusaun la’o ona, maske seidauk maka’as, maibé espera ezekusaun ne’e la’o ho diak, tanba fulan Setembru OJE 2018 aprova ba fulan haat, maibé fulan Setembru hatama tiha ba duodésimu, entaun ezekusaun fulan tolu deit.
“Ami espera katak, ezekusaun ida ne’e la’o ho diak, klaru ke ami labele previzaun ke se la ezekuta hotu, tanba fulan Setembru orsamentu 2018 aprova ba fulan haat, Setembru, Otubru, Novembru no Dezembru, primeiru estar Setembru ne’e ami hatama tiha duodésimu, entaun fulan tolu de’it, maibé fulan tolu ne’e ezekusaun fulan rua ho balu de’it”, dehan PM Taur ba jornalista sira, hafoin remata enkontru ho PR, iha Palasiu PR Nicolau Lobato, Dili, Kinta (18/10/2018).
Xefi Governu ne’e afirma, Ministériu sira ne’ebé mak sei mamuk ne’e, sempre afeta ba ezekusaun, maibé Governu halo esforsu tomak para minimiza impaktu iha ezekusaun orsamental.cos
