Governu liu husi reuniaun Konsellu Ministru (KM), Kuarta (14/11), aprova ona dekretu Governu ida hodi hasa’e subsídiu alimentasaun Funsionáriu Públiku (FP) sira nian husi US$ 30 ba US$ 70.
Ministru Prezidensia Konsellu Ministru, Agio Pereira, informa, desizaun ida ne’e mosu relasiona ho preokupasaun iha debate Orsamentu Jeral Estadu tinan 2018 liu ba.
“Konsellu Ministru mós aprova dekretu Governu nian hodi fó subsídiu alimentasaun ba funsionáriu sira, no Diresaun Nasional Seguransa Patrimonio Públiku nian. Iha tinan 2013 Konsellu Ministru aprova tiha ona dekretu Governu ida hodi fó subsídiu ba sira kada fulan US$ 30, maibé ohin (Horiseik) Konsellu Ministru aprova hodi hasa’e ba dolar amerikanu 70”,informa Agio Pereira ba jornalista sira iha Palásiu Governu Dili, hafoin reuniaun KM.
Nia esplika, proposta hasa’e subsídiu alimentasaun ba funsionáriu sira ne’e, mai a par ho Parlamentu Nasional nia intensaun rasik.
Nia haktuir, reuniaun KM ne’e mós, kontinua aprova projetu lei orgánika ministériu sira nian hanesan, Ministériu Interior nia lei orgánika aprovadu tiha ona, maibé ida ne’e prosesu ida todan oituan, tanba ekipa tékniku sira nia servisu kleur tebes, hodi halo análiza, tanba estrutura ne’e tenki permanente, funsional no adekuadu mós ba projetu orsamental 2019 nian.
Agio afirma, lei orgánika Ministériu Solidaridade Sosial no Inkluzaun mós aprova ona iha Konsellu Ministru.
“Ida ne’e diak, tanba atu harii Institutu ba asistente sosial nian, no tenki hili ema atu kaer fundus ne’ebé Parlamentu Nasional aprova”, katak Agio Pereira.
Nia haktuir, Ministériu Agrikultura no Peskas mós, ministériu ida ne’ebé tuan ona, maibé aktualiza nafatin nia lei orgánika, no hetan ona aprovasaun iha Konsellu Ministru.
“Ikus liu mak lei orgánika Sekretária Igualdade no Inkluzaun, tanba Sekretariadu ne’e iha Primeiru Ministru nia okos, entaun nia tenki iha orgánika ketak no aprovadu tiha ona”, relata Agio.cos
