Governu konstituisional daualu liu husi reuniaun Konsellu Ministru (KM) extraordináriu, Sesta (23/11/18), aprova rezolusaun hodi nomeia Xefi Negosiador Prinsipal Delimitasaun Fronteira Marítima, Kay Rala Xanana Gusmão, reprezenta Estadu Timor-Leste (TL) hodi ba hala’o negosiasaun fronteira terrestre entre TL ho Repúblika Indonézia (RI).
Ministru Prezidensia Konsellu Ministru, Agio Pereira, hatete, alende nomeia Xanana, Governu mos nomeia Roberto Soares ne’ebé dadaun ne'e asumi kargu hanesan embaixador Timor Lete iha Indonesia sai hanesan xefi ekipa téknika Negosiasaun Fronteira Terrestre (NFT).
“Ohin (Horiseik) konsellu Ministru extraordináriu halo dezisaun hodi nomeia Xanana reprezenta Estadu ba NFT no nia prosesu atu hahú no bainhira mak atu halo negosiasaun ba fronteira terestre ne'e Xefi teknika atual embaixador Timor Leste ba Indonesia maka hatene liu, maibe asuntu ne'e sei hetan tulun husi gabinete fronteira marítima”,dehan Agio Pereira ba jornalista sira hafoin remata reuniaun Konsellu Ministru extraordináriu iha Palásiu Governu.
Iha fatin hanesan embaixador Timor-Leste ba Indonesia, Roberto soares, haktuir, antes atu aprova rezoluzaun ne'e Governu Timor-Leste ho Governu Indonesia iha ona komunikasaun no konkordansia hodi koalia kona ba fronteira terrestre.
“Ba ha’u onra bo’ot hetan konfiansa husi Governu bele sai chefi ekipa negosiasuan teknika nune'e ita bele hetan solusaun lalais ba fronteira terestre entre nasaun rua ne'e, liu liu liga ba fronteira balun ne’ebé sei iha disputa durante tinan barak ona mak hanesan,Citrana, Naktuka no Vizaeal Suna Novel iha Passave RAEOA”,esplika Roberto.
Nia afirma, ho rezolusaun ne’e Timor-Leste iha nia komitmentu no prontidaun bo’ot atu solusiona kestaun fronteira terestre nian hodi reforsu relasaun bilateral Indoneia no dadaun ne'e nasaun rua ne'e iha komitmentu buka solusaun hodi hetan determinasaun nune'e bele fasilita povu iha nasaun rua ne'e halo movimentu ba mai.ety
