GMN TV Politika Governu seidauk desidi fonte orsamentu sosa asaun kompañia Shell ■ Kongratula Xanana Gusmão

Governu seidauk desidi fonte orsamentu sosa asaun kompañia Shell ■ Kongratula Xanana Gusmão

0 views

Primeiru Ministru (PM), Taur Matan Ruak, hateten, governu seidauk desidi fonte orsamentu atu sosa asaun kompañia Shell husi Australia ba partisipasaun iha esplorasaun Greater Sunrise (GS).

Tanba ne’e wainhira iha ona desizaun, governu sei fo sai ba públiku kona-ba fonte orsamentu ne’ebe governu foti hodi sosa asaun kompañia Shell nian.

“Konsellu Ministru aban (ohin-Red) mak aprova rezolusaun, tanba ne’e mak sei diskute depois mak sei pasa fali ba ita bo’ot sira. Se ita bo’ot sira haree orsamentu kona-ba ConocoPhillips nian ne’e mai husi fundu petroliferu. Agora kona-ba Shell nian ita seidauk iha desizaun, tanba ne’e ha’u seidauk bele informa ba ita bo’ot sira, maibe iha tempu badak kuandu desizaun iha ona talves ami sei informa, se osan ne’e ita foti iha fundu petroliferu ga mai husi fonte seluk”,deklara PM, Taur Matan Ruak, ba Jornalista sira hafoin enkontru regular ho Prezidente Repúblika, Francisco Guterres Lú Olo, iha Palasiu Prezidensiál Nicolau Lobato, Díli, Kinta (22/11/2018).

Entretantu  iha loron 21 fulan Novembru tinan 2018  Timor-Leste ho Kompaña  Shell asina ona akordu sosa asaun kompañia Shell ho pursentu 26.56%  ho osan US$300 iha kampo mina GS.

Akordu ne’e rasik asina husi reprezentante espesial Timor-Leste, Kay Rala Xanana Gusmão no Prezidente Ezekutivu kompañia Shell Austrália, Zoe Yujnovich, iha Bali Indonesia.

Antes ne’e reprezentante espesial  Timor-Leste, Kay Rala Xanana Gusmão, ho Prezidente Kompana Conocophillips, Crish Wilson, asina akordu sosa asaun Conocophillips ho momntante orsamentu millaun US$350 ka pursentu 30, iha Hotel Conrad, Nusa Dua Bali, Indonézia.

Orsamentu sosa asaun Kompaña Conocophillips ne’e mai husi fundu petrolíferu.

Kongratula Xanana Gusmão

Nune’e mos, Prezidente Parlamentu Nasionál (PPN), Arão Noe, kongratula Xefi Negosiadór Prinsipal Fronteira Marítima, Kay Rala Xanana Gusmão, tanba liu husi ninia esforsu hamutuk ekipa fronteira marítima, konsege konvense ona kompañia internasionál Shell hodi fa’an ninia asaun millaun USD300 ba Estadu Timor-Leste.

“Aproveita tempu ida ne’e, dala ida tan em nome PN no povu Timor-Leste agradese ba maun boot Kay Rala Xanana Gusmão ne’ebé luta nafatin para atinji hodi liberta povu ida ne’e liu husi ekonómia, tanba libertasaun Nasionál, ita liberta tiha ona”,PPN ba jornalista sira hafoin reuniaun ho Prezidente Komisaun sira iha sala konferensia PN, Kinta (22-11-2018).

Xefi Órgaun Lejilativu ne’e esplika katak, ekonómikamente Timor-Leste seidauk libertadu, maibé ho susesu ne’ebé maka agora atinji tan hanesan iha loron 21, fulan ne’e, asina on iha Bali, ne’e parte pozitivu ida ba Timor-Leste, katak 100% pipeline sei mai Timor-Leste.

“Ho pipeline mai ekonómia Timor-Leste nian bele dezenvolve lais liu do que agora, tanba ho dezenvolvimentu kampu Sunrise ninian ne’ebé dada mai bele fó rendimentu ba area tolu (3) hanesan Betano, Beaço no Suai bele sai dezenvolvidu, to’o tinan 10 Timor mós bele iha sidade iha Kosta Súl, mezmu ida ne’e sei iha desizaun nia laran no foin sai akordu, maibé Negosiador Prinsipal, Xanana Gusmão kuandu fila mai maka sei relata ba Governu no opsaun saida maka sei hola em relasaun osan para hola saham ida ne’e”, haktuir Arão Noe.

Nia akresenta, sei iha posibilidade Governu atu halo revizaun ba Orsamentu Jeral Estadu (OJE) 2019, tanba agora sei iha faze debate, nune’e atu halo asaun saida de’it, sei bele hela atu foti desizaun.

“Informasaun média sosial no média komunikasaun husi jornal mós ohin publika, ha’u haree ida ne’e susesu boot ida tan atinji, sé konta husi saham ne’ebé maka iha, mai tan ho Shell ninian, sé ita hola hotu rua (2) ne’e, ita iha 56.5%, ne’e katak maioria saham iha Greater Sunrise ninian Timor maka domina, ho ida ne’e pipeline atu mai Timor laiha difikuldade ona, tanba Timor iha saham mais de 50% no nia maka sei desidi”, relata Xefi Órgaun Lejislativu ne’e.

Entretantu akordu sosa asaun husi kompañia petrolífera interNasionál Shell husi Holanda ne’e, asina iha Hotel Codrat Nusa Dua-Bali, Indonesia partisipa husi Prezidente Timor GAP, Prezidente Autoridade Nasionál Petróleu no Minerais, Eis Ministru Petróleu no Minerais, Eis Ministru Finansas no emprezariu husi Australia.

Antes ne’e mós, Timor-Leste asina ona akordu ho kompañia petrolífera Amerikana ConocoPhillips hodi sosa asaun ho 30% ho osan hamutuk millaun USD 350.Ías/Ves


Banner

Foto

Notisia Ikus

Singapura mak trava TL tama ASEAN, LUGU: Horta bele konvense

May 18, 2022
Diplomata senior Timor-Leste, José Luis Guterre...

Delegasaun Angola hasoru PR eleitu

May 18, 2022
Prezidente Repúblika (PR) eleitu, José Ramos H...

PR Lú Olo: Tempu ona atu halo revizaun ba K-RDTL

May 18, 2022
Prezidente Repúblika (PR), Francisco Guterres L...

PN aprova Projetu-Lei responsabilidade PR iha finál globál

May 17, 2022
Parlamentu Nasionál (PN) Kinta Lejislatura, apr...

PR Lú Olo kondekora veteranu 83

May 17, 2022
Prezidente Repúblika (PR) Francisco Guterres L...
1 2 3 727

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker