Governu Timor Leste (TL), liu husi Konsellu Ministru (KM), aprova ona osan rihun US$ 250 hodi kria fundu ida atu ajuda nasaun sira ne’ebé mak iha problema kona ba delimitasaun Fronteira Marítima (FM).
Ministru Estadu Presidensia Konsellu Ministru, Agio Pereira informa, fundu ida ne’e, la’os TL de’it mak tau osan, maibé nasaun seluk mós sei tau hamutuk osan ba fundu ida ne’e.
“Konsellu Ministru halo mós rezolusaun importante ida, no rezolusaun ne’e atu ita nia Estadu kontribui rihun US$ 250, ba kriasaun fundu ida hodi apoiu rai ki’ik sira ne’ebé iha mós asuntu kona ba delimitasaun fronteira marítima sira ne’e, iha UNCLOS nia okos,” relata Agio Pereira ba jornalista sira iha Palásio Governu Dili, Kuarta (31\10).
Agio esplika, Governu TL kria fundu ida ne’e bajeia ba esperensia TL nian ne’ebé gasta osan barak ba delimitasaun fronteira marítima ho Australia.
“Orsamentu ida ne’e la’os ita de’it mak tau, maibé ita tau ida ne’e para rai seluk mós tau hotu osan ba fundu ne’e, hodi tulun prosesu ne’e, tanba ita nia esperensia hatete katak, prosesu ne’e la baratu, ita manan soberania maka’as, maibé ita tenki investe osan mós maka’as,” tenik Agio.
Iha okajiaun ne’e mós, Konsellu Ministru mós diskuti kona ba lei organika Ministériu ida-ida nian, tanba estrutura orsamentu jeral Estadu nian, presija informasaun lolos husi estrutura ministériu ida-ida nian, hodi bele hatama ba sistema atu aprezenta proposta ba debate iha Parlamentu Nasional.
“Ohin loron ne’e, orgánika Ministériu Transporte no Komunikasaun, Ministériu Saúde, Ministériu Ensino Superior, Siensia no Kultura, Ministériu Defeza, Ministériu Edukasaun Joventude no Desportu mós liu ona iha Konsellu Ministru. Ida ne’e hanesan bai-bain, Governu sei halo eleisaun final hodi haruka ba Prezidensia Repúblika atu promulga,” relata Agio Pereira.cos
