Governu liu husi reuniaun Konsellu Ministru, aprova ona konstrusaun estrada diresaun Munisípiu Baucau ba Viqueque hodi halo rehabilitasaun no melloramentu.
Ministru Estadu Prezidensia Konsellu Ministru, Agio Pereira hateten, projetu ne’e, sei hahú iha tinan 2019 no sei remata iha tinan 2021. Orsamentu ba projetu ne’e, mai husi emprestimu husi Banku Dezenvolvimentu Aziátiku ka ADB.
“Reuniaun Konsellu Ministru ne’e mós, ko’alia kona ba estrada Baucau ba Vikeke atu hadia, ne’ebé ADB mós halo parte iha laran, no involve mós emprestimu, husi ADB ne’ebé Ministériu Finansas prosesa atu aselera konstrusaun estrada ne’ebé liga Baucau ho Vikeke,” katak Agio Pereira ba jornalista sira iha Palásio Governu Dili, Kuarta (31/10/2018).
Nia haktuir, Projetu rehabilitasaun no melloramentu estrada Baucau ba Vikeke ne’e, orsamentu mai husi emprestimu ne’ebé f’o husi Banku Dezenvolvimentu Áziatiku.
Prazau ezekusaun ba projetu ne’e tinan tolu, no sei hahú iha tinan 2019 no sei remata iha final tinan 2021.
Agio Pereira afirma, objetivu principal husi projetu ne’e mak buka atu fornese rede estrada ida seguru liu, viavel no ho kualidade bo’ot. Estrada foun ne’e, sei sei fó impaktu pozitivu tebes tanba sei reforsa aumentu no efisiensia mobilidade ba ema no sasan no sei apoia atu hasa’e mós ekonómia no hatun kiak iha área rural sira.
Maske nune’e, Agio Pereira la esplika klaru kona ba montante orsamentu emprestimu ne’ebé ADB fó ba projeitu ne’e.cos
