Reitor Universidade Paz (UNPAZ), Lucas da Costa, hatete Orsamento Jeral Estado tinan 2018, la ezekuta hotu iha tinan ida nee, mak VIII Governu nia desempenho servisu ladun diak, no sei fo razaun ba Prezidente Repúblika Francisco Guteres Lu-Olo, atu veta Orsamento Jeral Estado ba tinan 2019, neebe ho Montante Dolar Amerikanu billiaun 1.827, tamba VIII Governu laiha kapasidade atu ezekuta OJE tinan ida nee to’o remata.
“ Iha OJE tinan 2019,Prezidente Repúblika Francisco Guteres Lu-Olo, hola atetude ida la hanesan ho hakarak VIII Governu nian, mak labele fo sala ba Prezidente, tamba VIII Governu, mak laiha duni kapasidade atu implementa hotu OJE tinan ida nee”, dehan Reitor Universidade Paz (UNPAZ), Lucas da Costa, ba JN-Diario, segunda (12/11/2018), iha Manleu Dili.
Akademiko nee haktuir, VIII Governu laiha kapasidade, tamba Governu bo’ot no Membru Governu seidauk kompletu , entaun Dotasaun Orsamento iha Ministériu balun la konsege ezekuta, no VIII Governu falha kedas iha tempu neebe konfigurasaun ba Membru Governu, entaun sei Governu kiik, maibe Funsaun servisu barak, mak VIII Governu bele implementa OJE tuir Ministériu ida-idak, tuir lei organika.
Iha parte seluk, Jurista Manuel Tilman, hatete ita agora iha orsamento retifikativu, signifika katak orsamento neebe VIII Governu halao dau-dauk nee, hahu husi Fulan Setembru no remata iha loron 31 fulan Dezembru tinan 2018.
“ Hau hanoin, buat hotu desiliquibrado oituan, tamba deit seidauk iha Ministru 9 neebe seidauk simu toma de posse, agora konaba OJE tinan ida nee, iha informasaun neebe kontardis malu, tamba Ministériu Obras Públikas, seidauk ezekuta sira nia Orsamento, no komfirme informasaun neebe Primeiru Ministru Taur Matan Ruak, hatete katak atu selu dívidas ba Emprezario Nasionais”, dehan Jurista Manuel Tilman.
Manuel afirma, agora Parlamento iha Komisaun Inkeritu Parlamentar, neebe sei ba halo fiskalizasaun ba projeitu sira neebe seidauk selu, no hanesan nee Orsamento ba MOP sei tomak hela, maibe iha Informasaun seluk husi Ministériu Finansas,dehan OJE ba tinan nee hotu ona, ida nee signifika OJE ezekuta ona 80 %, maibe sei ezekuta ona 80 %, ezekuta iha neebe.
“ Tamba iha Fúnsionariu Públiku, neebe oras nee depende ba OJE, ohin loron seidauk simu salario, nee duni informasaun neebe sai husi Ministériu Finansas, los duni galae, no iha fulan Outubro nia laran, ita iha problema pagamento Free Balance blokeado hela, nee duni ita seidauk hatene, Ministériu Finansas desblokea tiha ona ga lae.
“ Agora, Ministériu Edukasaun, mos iha hela problema ida neebe sira nia Professor/a sira barak, neebe eventaul katak seidauk simu salario, tamba nee Governu nia programa los tiha no Ministeriu ida-idak iha Ministru, hau hanoin buat hotu sei laos, tamba iha organika Governu, Ministru mak iha kompetensia,atu jere Ministériu, laos Vise Ministru no Sekreario sira.” Reafirma Jurista, Manuel Tilman.Fel
