Atu estuda no análiza klean kona-bá VIII Governu nia planu hodi ezekuta Orsamentu Jeral Estadu (OJE) 2019, Tersa (20/11), liu husi enkontru líder bankada parlamentu Nasional (PN) desidi suspende audiénsia OJE 2019 entre komisaun sira iha PN ho membru Governu sira, tanba membru Governu seidauk prepara livru hirak ne’ebé maka sei esplika prosesu ezekusaun orsamental.
“Kona-bá audiénsia públika ho membru Governu ba preparasaun debate OJE tinan fiskal 2019 nian hahú ona iha loron Segunda (19/11), maibé infelizmente husi ami-nia reuniaun líder bankada ohin (horiseik) ami desidi atu suspende debate audiénsia ho membru Governu ba semana ida ne’e”, Primeira Vise Prezidente PN, Maria Angelina Sarmento ba jornalista sira iha resintu PN, hafoin remata enkontru líder bankada iha meja Prezidensia Parlamentu.
Nia esplika, razaun PN desidi suspende lai audiénsia ho membru Governu kona-bá livru atu esplika prosesu ezekusaun OJE 2019 seidauk kompletu no presiza haree mós ho rezimentu PN nian, kona-bá prazu ba debate ne’ebé loloos ne’e tenki to’o loron 10 ou 15, maibé iha loron 6 de’it.
“Razaun primeiru suspende audiénsia ho membru Governu, kona-bá dokumentu sira hanesan, livru 2 kona-bá planu asaun, livru 4A ho ho 4B ne’e kona-bá munisípiu nian, livru 3 ne’e maka importante tebes atu deputadu sira lee uluk lai dokumentu 3 ne’e, hodi halo referensia ba dokumentu ne’e, maka foin bele kria pergunta ba Governu kona-bá Governu nia planu atu ezekuta programa sira iha tinan 2019, antes debate iha jeneralidade no espesialidade”, haktuir Maria Sarmento.
Nia akresenta, semana oin maka PN sei kontinua revê fali ajenda audiénsia no sei komunika fali ba Governu atu haree ministériu sira ne’ebé maka re-ajenda ona sira nia orariu debate, sira bele comparecer iha semana oin, hodi kontinua audiénsia.
“Ba debate sira ne’ebé maka realiza tiha ona horiseik (horibainrua-red) ho balun ne’ebé realiza ohin (horiseik-red) bele kontinua, maibé hahú husi ohin (horiseik-red) lokraik sei suspende, ho razaun ida katak deputadu sira lamenta uitoan ho dokumentus importante ne’ebé Governu presiza submete mai PN atu bele kontinua halo audiénsia ho ministériu sira”, informa Primeira Vise PN ne’e.
Entretantu Governu promete ona katak, tarde liu iha loron 22 Novembru ne’e, sira sei kompleta hotu dokumentu sira ne’ebé maka sei falta, hodi distribui ba deputadu sira.
Enkuantu proposta OJE 2019 ne’ebé Governu haruka ona ba PN atu hetan apresiasaun molok ajenda ba diskusaun no votasaun hamutuk USD billlaun 1.8. ves
