Orsamentu Jerál Estadu (OJE), tinan 2019 iha posibilidade sei sa’e to’o dolar amerikanu billaun US$ 2.
Reuniaun Konsellu Ministru (KM) ne’ebé hala’o iha Kuarta (31/10) Governu halo ajustamentu ba orsamentu adisionál ho OJE 2019, molok aprezenta ba Parlamentu nasionál.
Foin dadauk iha reuniaun Komite Revizaun polítika orsamental, ne’ebé hala’o durante semana ida iha Ministériu Finansas Aitarak Laran Díli, maioria ministériu hotu husu orsamentu adisional.
Orsamentu adisionál ne’ebé ministériu sira husu iha Komite Revizaun polítika orsamental ne’e, nia millaun US$ 650.
Entretantu OJE 2019 ne’ebé antes ne’e Governu aprova iha Konsellu Ministru ho montante bilaun US$ 1.350. Ho nune’e iha posibilidade Orsamentu Jerál Estadu tinan 2019, bele sa’e to’o dolar amerikanu billaun US$ 2.
“Konsellu Ministru, ko’alia kona ba Orsamentu Jeral Estadu 2019, ne’ebé durante semana ida iha Ministériu Finansas, hodi haree detaillas ruma atu ajusta ka la’e, kona ba parte ne’ebé ita bolu orsamentu adisional sira ne’e,” informa Agio Pereira, ba jornalista sira iha Palásio Governu.
Nia esplika, reuniaun Konsellu Ministru ne’e, haree ajustamentu orsamentu adisional sira ne’e, antes Ministériu Finansas halo aprezentasaun final ba Konsellu Ministru atu aprova hodi hatun ba Parlamentu Nasional.
“Tanba ida ne’e komu seidauk hotu lolos iha sistema finansas, ami labele ko’alia lai, semana oin mai bele fó sai ona,” katak Agio Pereira.cos
