Vise Xefe bankada FRETILIN, Francisco Miranda Branco konsidera, koligasaun Aliansa Mudansa ba Progresu (AMP), ne’ebé ukun iha Governu da-walu ne’e, la’os tanba responsabilidade, maibé buka oportunidade hodi fahe poder ba malu, tanba tau assesor barak tebes iha kada ministériu, inklui troka kargu xefia sira konforme sira-nia hakarak.
“Loos liu mak ida ne’e, fahe poder ba malu, ida kuandu sai bo’ot ona, nia amigus, nia família tama hotu, mezmu laiha baze legal, maibé ami sei haree dadauk, 140 assesores, ida ne’e demais liu, tanba ida ne’e mak ita haree Orsamentu Jerál Estadu ba tinan 2020 ne’e, bens e servisus bo’ot demais ne’e, kuaze millaun USD 8 kedan, tanba atu sustenta ba fasilidade sira ne’e”, tenik Branco ba jornalista iha Kuarta (20/11/2019).
Deputadu opozisaun ne’e mós konsidera, nomeasaun polítika barak iha ministériu sira, aumenta mós pezu ba mákina Estadu, tanba ne’e, progresu dezevolvimentu sei hanesan lenuk, tanba kareta roda tolu ho pezu ne’ebé bo’ot.
“Lei fó duni, maibé dala ruma ita abuza liutan, ita aumenta nia númeru, ida ne’e ami sei haree didi’ak, kada ministériu ida, tuir lei, se la sala 11, inklui iha Vise Ministru no Sekretáriu Estadu, maibé dalaruma iha Sekretáriu Estadu de’it mós ita haree batallaun ida mak servisu ho sira, entaun ita utiliza finansas públika ne’e, hodi aproveita oportunidade, duke servisu mellora povu nia moris, maibé ita aproveita oportunidade hamoris ita-nia aan, no ema sira ne’ebé besik ita. Povu ne’e juta resin de’it, ita ho mákina Estadu bo’ot, depois mai tan ho nomeasaun polítika bar-barak ne’e, ita hatodan tan mákina Estadu, envez de ita hakmaan para nia bele servisu ho kmaan no aselera, ita hatodan liu fali mákina Estadu, tanba ne’e servisu dólar de’it, tanba mákina Estadu ne’e, ita aumenta tan pezu ba mákina Estadu ne’e, hanesan ita haree dadauk ne’e”, afirma Francisco.
Antes ne’e, deputada Virginia Ana Belo mós kestiona katak, tanba assesores barak iha VIII Governu konstitusional, hodi fó impaktu ba Orsamentu Jerál Estadu.
Aleinde ne’e, deputada AMP balun mós kestiona ona katak, governasaun AMP benfísia liu partidu PLP, tanba mudansa estrutura iha mandatu VIII Governu, domina husi ema PLP.
Entertantu, Orsamentu Jerál Estadu ba tinan 2020 billaun USD 1.950 ne’ebé Governu propoin ba Parlamentu Nasionál, kompostu husi saláriu vensimentu millaun USD 241.3 no bens servisu millaun USD 727.6.say
