Prezidente Parlamentu Nasionál (PPN) Arão Noe de Jesus da Costa Amaral informa, maske kareta foun 35 ne’ebé atribui ona ba deputadu foun sira, maibé kareta hirak ne’e sei kontinua uza xapa mátrikula privadu, tanba xapa mean ne’ebé Estadu atribui sei prosesa hela iha Diresaun Nasionál Transporte Terrestre (DNTT).
“Sei atraza uitoan husi diresaun nasionál transporte terrestre, tanba sira mak mai emite dokumentus ofisial sira, tanba ne’e mak ami sei hein hela maibé, uza hela privadu ne’e hodi halo kontrolu maibé, kuandu sai ona mátrikula ofisial PN nian mai ho nia númeru kompletu, ami sei troka hotu, depende ba DNTT nia prosesu, sei hotu semana ne’e, ami muda kedas, tanba ne’e ami hein de’it sira fornese mai, ami troka ona”, informa Prezidente Parlamentu ne’e ba jornalista sira, iha nia kna’ar fatin, Kinta (14/11/2019).
Líder másimu segundu órgaun soberanu ne’e mós affirma katak, kareta foun tolu nolu resin ne’e, atribui hotu ona ba deputadu foun sira ne’ebé foin hakna’ar aan iha mandatu kinta lejislatura nian.
“Deputadu sira ne’ebé uluk uza kareta privadu 27, depois 8 uza kareta patrimóniu PN nian, ida ne’e rekolla hotu ona, agora dadauk ba deputadu sira laiha difikuldades ona, hodi halo fiskalizasaun no ba hala’o sira-nia kna’ar, tanba hotu-hotu uza ona transporte”tenik Noe.
Maske nune’e, PPN ne’e afirma, Parlamentu Nasionál seidauk simu informasaun husi tribunal, kona-bá kareta prado husi terseira lejislatura ne’ebé antes ne’e sai polémika iha públiku, tanba eis deputadu sira, hafoin halo alinasaun ba kareta prado refere, ho montante dollar amerikanu rihun USD 8 ba kada kareta.
Tanba ne’e, atual Prezidente Parlamentu Nasionál deside lori prosesu refere ba ministériu públiku, nune’e bele prosesu tuir dalan legal, ba deputadu sira ne’ebé lakohi intrega hikas kareta refere.
No iha kareta prado 20 mak atual deputadu sira kontinua uza, tanba balun re-eleitu ba mandatu kinta lejislatura nian, no balun mak konsege entrega hikas kareta ba PN.Say
