Sekretáriu Jerál Partidu Kmanek Haburas Unidade Nasionál Timor Oan (KHUNTO), José Agustinho da Silva, hateten, KHUNTO prontu simu desizaun husi Primeiru Ministru Ministru (PM) Taur Matan Ruak, ba remodelasaun VIII Governu, tanba PM Taur mak iha kompetensia másimu tuir konstituisaun haruka.
Partidu mós sei simu desizaun xefe ezekutivu nian wainhira deside hodi hasai governante balun ne´ebé mai husi KHUNTO.
“Kompeténsia sua Primeiru Ministru nian, mas núdar públiku asesu ba informasaun ita hotu hatene katak, governu ida ne’e, governu AMP ne’ebé kompostu iha partidu tolu. Ne’ebé ami iha lideransa superior partidu ninian ita nia maun boot Kay Rala Xanana Gusmão ita nia Primeiru Ministru Taur Matan Ruak núdar mós porta voz ba AMP no Konselleiru Partidu KHUNTO, ne’ebé ha’u hanoin kona-ba asuntu ne’e sira nain tolu mak koordena buka solusaun”,esplika José Agustinho da Silva, ba jornalista Sesta (22/11/19) iha GMN, Bebora-Díli.
José Agustinho da Silva ne’ebé oras ne’e asume knaar hanesan Ministru Transporte No Komunikasaun ne’e, konsiente teb-tebes ho problema ne´ebé akontese iha ministériu ida ne´e no sai ema hotu nia preokupasaun mak eletrisidade ne´ebé sempre mate iha Aeroportu Internasionál Nicolau Lobato Comoro.
Tamba ne´e, karik Primeiru-Ministru deside hodi nomeia ema seluk hodi lidera ministériu ne´e, José Agustinho da Silva simu desizaun ida ne´e.
“Nu’udar ema buat ida pozisaun ne’e konfiansa, ne’e pozisaun polítika, ne’ebé ita ténki gentleman, bahasa dehan berjiwa besar, asumi kargu bainhira iha konfiansa, mas kuandu laiha ne’e lapang dada, laiha sentimentu ida sai. Ne’ebé ha’u hanoin iha Timor-Leste iha figura sira ne’ebé mak diak, mas atrativu iha koñesimentu iha esperiénsia”,dehan José Agustinho da Silva.
Iha konferénsia nasionál ne´ebé hala’o foin lalais nee iha Tibar, AMP deside atu halo remodelasaun hodi hadia dezempeñu governu no responde ba nesesidade dezenvolvimentu iha Timor-Leste.
Maske nune’e iha sorumtu ho Prezidente Repúblika, Primeiru Miinistru afirma sei halo uluk avaliasaun ba governante sira, maibé la hatete bainhira mak akontese remodelasaun.
PM Taur Matan Ruak mos konsidera teb-tebes opiniaun públika kona ba remodelasaun ne´ebé AMP deside durante konferénsia.avi
