Deputada bankada CNRT, Maria Fernanda Lay, konsidera programa sesta bázika ne’ebé Governu implementa la kondiz ho situasaun real iha munisípiu, postu suku no aldeia sira iha teritóriu Timor-Leste.
“Tuir loloos populasaun presiza mak osan ho ai-han la’os atribui fali batar tomak ba ferik no katuas sira. Alénde ne’e kona-bá komunidade munisípiu Covalima nia lamentasaun tuir loloos Governu tenke hatene sé komunidade la hakiak manu, tenke troka fali ingrediente seluk ne’ebé nia folin hanesan. Tanba ne’e komunidade husi munisípiu Covalima konsidera programa sesta bázika ne’e programa bosok povu, deskulpa Ministru pasta dente ki’ik oan ne’e sira ne’e, ita-nia povu durante ne’e la kose nehan mak ita boot fó ka, sira presiza ai-han ho osan, ita boot lori batar tomak ba katuas sira han halo nusa, ba Covalima laiha manu labele fó manu, ida ne’e mak ha’u sente komplikadu. Ekonomia iha rai-laran, loloos ne’e munisípiu ne’ebé produs barak distribui fali ba munisípiu ne’ebé menus produsaun, sé lae problema”, Deputada bankada CNRT ne’e liu husi ninia intervensaun bainhira komisaun C, D no E hala’o audénsia konjunta ho Ministériu Koordenadór Asuntu Ekonómiku (MAKE) iha Parlamentu Nasionál (PN), Segunda (09-11-2020).
Xefe bankada PD, António da Conceição “Kalohan”, hateten, la’ós ona tempu Governu atu halo distribuisaun sasan, maibé importante mak Governu halo intervensaun ba merkadu, ho nune’e labele hatoman povu sai dependénsia ba tulun husi Governu.
“Aktu sira governativa ne’ebé ita halo intervensaun do merkadu la’ós distribuisaun sosiál intervensaun merkadu iha tempu normal, lori tempu ida ne’ebé susar atu dehan, bele atinji meta ne’ebé ita hakarak bele asegura ou la’e. Iha fulan Novembru no Dezembru bele posível ministru lori trek boot sa’e ba suku no aldeia hodi fahe hanesan iha Metinaro, sé la konsege sira ne’ebé simu no ladauk simu justisa iha ou la’e”, tenik Kalohan.
Maske hetan krítika, maibé deputadu sira husi bankada Governu kontinua apoiu polítika Governu, hodi implementa programa sesta bázika.
“Ha’u hanoin programa sesta bázika programa ne’ebé di’ak tebes, tanba ita bele halo buat rua dala ida, estimula produsaun no fó apoiu ba ita-nia komunidade sira bele hadi’a esforsu ne’ebé mak perfeitu, programa ne’ebé boot liu ona kobre teritóriu sempre iha dezafiu. Maske implementa programa refere hasoru dezafiu, maibé Governu tenke avansa nafatin tanba programa ida ne’e di’ak tebes“, tenik deputadu bankada PLP ne’e.
Entretantu, Governu implementa ona programa sesta bázika iha munisípiu Díli, Bobonaro no Covalima. ety
