Rejiaun Administrativa Espesiál Oe-Cusse Ambeno (RAEOA) propoin millaun USD 127 iha Orsamentu Jerál Estadu (OJE) tinan 2021, inklui tau osan millaun USD 14, hodi finaliza konstrusaun Ró Haksolok, nune’e bele lori mai Timor-Leste.
Relasiona ho proposta OJE ba RAEOA ne’e bankada CNRT husu klarifikasaun ba Prezidente autoridade RAEOA, Arsenio Paixão Bano, tanba kompañia konstrutór bankarota ona.
“Ami hetan informasaun RAEOA hanesan segundu kriadór ba kompañia Atlantic Eagle Ship Building osan hira mak RAEOA tau ona, osan hira maske iha hanoin atu tau ona, ida ne’e importante osan ne’ebé mak ita boot sira tau ne’e osan povu nian, liu liu povu RAEOA nian. Prezidente RAEOA tenke halo esplikasaun, tanba atu halo investe tan kompañia ne’ebé mak bankarote tiha ona, tanba ne’e presiza halo esplikasaun”, Xefe bankada CNRT, Duarte Nunes liu husi ninia intervensaun bainhira komisaun E, C no D hala’o audénsia konjunta ho Prezidente autoridade RAEOA iha Parlamentu Nasionál (PN), Tersa (10-11-2020).
Prezidente autoridade RAEOA, Arsenio Paixão Bano, klarifika nia parte prevé tan orsamentu, atu nune’e sira bele lori fila Ró Haksolok mai Timor-Leste.
“Sim Ró Haksolok ne’e Oe-Cusse hakarak lori fila, ha’u hanesan Prezidente autoridade RAEOA antes ne’e ha’u servisu ho eis prezidente autoridade RAEOA, Marí Alkatiri servisu ne’ebé mak ami agora halo kontinua servisu ne’ebé mak uluk iha tiha ona iha advoga servisu ne’ebé ami tau halo akompañamentu estudu tau osan lori Ró Haksolok fila”, tenik Prezidente autoridade RAEOA ne’e.
Maibé nia parte lakohi promete bainhira mak lori Ró Haksolok fila, tanba oras ne’e dau-daun COVID-19 sai problema mundiál.
“Ha’u atu hateten de’it apoiu husi Governu sentrál gabinete Primeiru Ministru ho apoiu husi eis prezidente autoridade RAEOA ami sei bele rezolve problema Ró Haksolok“, dehan Arsenio.
Antes ne’e, Prokuradór Jerál Repúblika, José da Costa Ximenes, hateten, kazu Ró Haksolok sei iha prosesu investigasaun. Ró Haksolok ho kustu USD tokon 13.7 ne’e inaugura iha loron 26, fulan Maiu, tinan 2017 no planu atu to’o iha Timor-Leste iha Outubru, tinan 2017.
Maibé to’o tinan 2020 ne’e Ró Haksolok seidauk to’o hela de’it, tanba kompañia Atlantic Eagle Ship Buillding ne’ebé halo konstrusaun ró ne’e bankarota, nune’e prejudika prosesu konstrusaun Ró Haksolok sai atraza no la konsege kontinua to’o ohin loron.
Iha prosesu konstrusaun ró refere kompañia husu tan orsamentu adisionál ho montante USD tokon 14 resin. Tuir estimasaun ró refere iha kapasidade atu tula ema na’in 300 resin no kareta hamutuk 15. Ety
