Deputada bankada CNRT, Maria Fernanda Lay, subliña, povu nia tusan Governu seidauk selu hotu, tanba Governu ladauk halo pagamentu subsídiu agregadu família USD 200 ba reklamante sira.
“Governu la halo rejistu dadus foun, ita la’o tiha ona esplika mai sei la repete o mesmo erro subsídiu USD 100 ne’ebé to’o agora sei tusan hela, agora ita ba tan programa sesta bazika. Tuir ha’u nia projesaun ita sei refere mós erros, mai tan ho bolsa ne’ebé ba ema gravida hotu, ha’u la kompriende”, Deputada bankada CNRT ne’e liu husi ninia intervensaun iha plenária bainhira komisaun E ho C hala’o audénsia ho KAFI, FDCH no fundu COVID-19 iha Parlamentu Nasionál (PN), Sesta (13-12-2020).
Fernanda Lay, hateten, maske Governu seidauk halo pagamentu kona-bá subsídiu agregadu ba família reklamante sira, maibé governu implementa ona programa sesta bázika, alende ne’e mós tuir deklarasaun Ministra Solidariedade Sosiál no Inkluzaun sei fó subsídiu mós ba inan isin-rua sira.
“Iha programa Governu nian laiha, maibé Ministra Solidariedade Sosiál nia deklarasaun sei atribui tan subsídiu ba inan isin-rua sira gravida sira. Ita hein esplodi númeru bebes iha Timor alende COVID-19 ho programa fó subsídiu ba ema gravida, ha’u hanoin ita sei problema boot ho resénsia tuir mai”, dehan deputada bankada CNRT ne’e.
Hatán ba preokupasaun ne’e, Vise Ministru Finansas, Sara Lobo Brites klarifika, Ministériu finansas simu ona proposta atu halo pagamento subdisiu ba agregadu família reklamante sira iha tempu badak.
Hatán ba preokupasaun ne’e, Vise Ministra Finansas, Sara Lobo Brites, klarifika, Ministériu Finansas (MF) simu ona proposta atu halo pagamentu subsídiu ba agregadu família reklamanete sira iha tempu badak.
“Tuir dadus ne’ebé mak MSSI uza hodi halo pagamentu ba suku balun agora presiza tebes atu hetan reforsu hodi halo pagamentu ba segunda ves, saldo insufisiente suku balun ne’ebé mak pagamentu kompleta tiha ona iha saldo ne’ebé sei eziste hela. Tanba agora iha faze atu rekolla fali saldo sira ne’e hodi redistribui fali ba suku sira ne’ebé mak sei kobre husi 13 mill resin benefisiáriu iha faze movimentu saldo no mos preparativu Sekretáriu Tékniku no Implementadór para atu realiza pagamentu ba iha ita-nia benefisiáriu sira ba segunda faze”, tenik Sara.
Antes ne’e, Vise Ministra Solidariedade Sosiál no Inkluzaun, Signi Sandrawati Verdial, hateten, agregadu família ne’ebé sei hetan pagamentu hamutuk 2900 no lista 13.000 mak haruka ba Ministériu Administrasaun Estatal (MAE), hodi halo verifikasaun. ety
