Xefe bankada KHUNTO, Olinda Guterres, husu klarifikasaun husi Governadór Banco Central de Timor-Leste (BCTL), Abrão de Vasconcelos kona-bá polémika Banku Federal Amérika (BFA) sei la transfere osan mai Timor-Leste (TL).
“Ami rona informasaun ne’e tebes ou lae? maske ami bele aprova Orsamentu Jerál Estadu (OJE), maibé BFA sei la fó osan tebes ou la’e? ka rona issu foer ida karik”, Deputada bankada KHUNTO ne’e liu husi ninia intervensaun bainhira komisaun D no C hala’o audénsia públika ho BNCTL no BCTL iha Parlamentu Nasionál (PN), Segunda (16-11-2020).
Olinda subliña, osan ne’ebé tau iha BFA ne’e osan povu nian, nune’e parte BCTL tenke halo klarifikasaun kona-bá polémika ne’e, atu nune’e públiku bele intende di-di’ak.
“Ha’u simu informasaun katak povu sira hasoru ha’u, sira hatete ama aprova osan, maibé osan laiha“.
Hatán ba kestaun ne’e, Governadór BCTL, Abrão de Vasconcelos, klarifika, informasaun dehan BFA la transfere osan mai ne’e laloos, nune’e Abrão husu ba públiku sira labele preokupa, tanba BCTL nia konta bankária mak iha estranjeiru la’os Governu nian.
“BCTL seidauk nota atu impede ita-nia osan labele mai, sé bainhira osan labele mai iha Timor bainhira banku iha Estadu Unidus Amérika sira blokeia konta bankária husi Estadu ida nian sira labele halo movimentasaun osan, tanba ne’e atu blokeia karik la’ós Governu nia konta, maibé BCTL nia konta. Ha’u aproveita informa ba públiku katak, labele tau kestaun dúvida ita-nia kapasidade atu uza ita-nia rekursu la afeta, tanba BCTL hanesan banku Governu Timor-Leste nian kontinua garante servisu atu apoiu Governu, la presiza preokupa ho asuntu ida ne’e, Governu halo ona levatamentu dezde inísiu Governu to’o ohin loron mais billões 12 liu, hodi ita finansia OJE”, tenik Abrão.
Relasiona ho polémika BFA sei la transfere osan mai TL, antes ne’e, iha loron 2, fulan Outubru, tinan ne’e, bankada FRETILIN konsidera informasaun ne’e falsa.
Enkuantu, Primeiru Ministru (PM), Taur Matan Ruak, deklara, Governu seidauk simu karta ruma husi Banku Federal Estadu Unidus Amérika kona-bá sei la halo transferénsia OJE ba BCTL. ety
