GMN TV Politika Xanana esplika “Plano da Paz”

Xanana esplika “Plano da Paz”

738 views

 

Eis Komandante em Xefe FALINTIL iha tempu rejisténsia, Kay Rala Xanana Gusmão, hatete “Plano da Paz” ne’ebé nia entrega ba Koronel Purwanto iha 1983 hodi fó ba Prezidente Indonesia, Soeharto ninia rejultadu mak mosu referendum 1999, no intervensaun ONU ba kazu Timor-Leste nian.

Xanana Gusmão koalia iha ninia palestra iha salaun Díli Institutu of Technology (DIT), semana kotuk iha ámbitu komemorasaun Masakre Santa Cruz, 12 Novembru 1991 ba dala 30.

Kay Rala Xanana Gusmão haktuir, iha tinan 1975 okupasaun Indonézia iha Timor-Leste, to’o 1978 bainhira primeiru Komandante Em Xefe Nicolau dos Reis Lobato mate, ema hotu lakon esperansa, tanba baze de apoiu hotu inimigu harahun.

No iha Dezembru tinan 1981, inimigu lansa operasaun ida hanaran “Operasi Kikis” ne’ebé envolve populasaun hotu hodi serku FALINTIL sira ne’ebé sei ejiste iha ai-laran. Husi Operasi Kikis ne’e FALINTIL lakon kuadru no militár, gerileiru barak mak mate.

“Iha Operasi Kikis ne’e lakon kuadrus polítikus no milatares no guerileiru barak no kompañia ida la’o ho ha’u “segmentu ligasaun nasionál” kompañia ne’e mos mohu kedas, ho deit guerileiru sanulu resin mak sei moris eskapa ho ha’u,” hatete Xanana.

Depois de Operasi Kikis, nia kontinua reorganiza hodi tau fila-fali kompañia sira ne’e, koloka sira iha fatin hotu-hotu hodi fahe tiha atensaun inimigu nian, nune’e inimigu labele ataka deit iha Ponta Leste, maibé iha rejiaun hotu-hotu sei iha forsa.

Ho atuasaun FALINTIL nian ne’e fo ona rezultadu, inimigu mós hanoin, sira nune’e orsida sai boot-tan, boot tan. Inimigu hatene tanba ami (FALINTIL) oho.

Xanana dehan, “kuandu mosu difikuldade labele rende, maibé hanoin oin nusa mak bele muda” tenik.

Iha tinan 1983 nia laran, bainhira inimigu haree FALINTIL sei ejiste, sira haruka fali intelijénsia hodi la’o hamutuk ho rede klandestina atu husu atu hasoru kuadru polítiku no militár sira hotu.

Husi oportunidade ne’ebé iha, nia tenta konfirma ho rede klandestina sira kona-ba objetivu husi inimigu husu atu hasoru ne’e mak konvense FALINTIL sira atu rende, hodi hakotu funu.

“Como ita iha organizasaun ne’ebé sei ki’ik, mais la’o ho diak, ha’u buka konfirma ho sira seluk imi husu tok, ba husu tok iha ne’ebá husu hanoin. Sira konfirma katak los duni, inimigu nia objetivu atu hasoru ami hodi konvense atu mai rende deit fó postu Jenerál, Jenerál deit iha TNI, sira seluk sa’e hotu Tenente” haktuir Gusmão.

Ho oportunidade ne’e, nia (Xanana) deside konvoka reuniaun ho diresaun superior Komité Sentrál FRETILIN (CCF-sígla portugés) foun ne’ebé deside eleitu iha konferénsia Laline Lariguto (1981) atu deskute asuntu ne’e.

Tanba ho kilat la to atus neen ita-labele hanoin katak, bele manan funu hodi duni inimigu sai, ba duni to’o fronteira ne’ebá, “ne’e duni ha’u (Xanana) dehan ba sira, labele mehi ida ne’e, ita sei labele mana funu ho via militár, nune’e ita tenke kaer mak solusaun polítiku diplomátika” konta Xanana.

Maibé hanoin ida ne’e diresaun superior CCF la simu no lakohi kedas atu hasoru malu ho inimigu. Tanba husi uluk kedas, Dezembru 75 mesmu antes to’o 1978, palávra de ordem husi CCF maka “negosiar não e nunca”, “mate ka moris ukun rasik an”, ami hotu hakilar mate ka moris ukun rasik an, negosiar labele negosia, haree ba mate, mate, mate balu ba rende tiha, membru Komité Sentrál rasik.

Depois de ha’u koalia ho sira, ha’u prepara tiha ona “planu da paz”, ha’u konvoka reuniaun ho membru superior sira hodi aprezenta planu mak ne’e, ita aproveita oportunidade ne’e hodi entrega ba Koronel Purwanto, hodi ba entrega iha Prezidente Indonézia Soeharto.

“Solusaun ne’ebé mosu iha 1999, ho intervensaun ONU nian liu husi UNAMET, solusaun ne’e maka ita nia planu da paz ne’ebé ha’u rasik entrega ba Koronel Purwanto atu haruka ba Soeharto iha 1983 to’o 1999. Ita tenke hein tinan 16, ida ne’e ho povu nia fiar, dedikasaun” konta tuir.

Mari Alkatiri kontra plano da paz

Sekretáriu Jerál partidu FRETILIN Mari Alkatiri, hafoin keixa Deputadu 21 husi CNRT ba Ministériu Públiku, (06/11/2020). Foto:GMN

Maske nune’e, iha Novembru 2020, Mari Alkatiri afirma, nia parte kontra “Plano da Paz” ne’e hahú kedas Xanana Gusmão sei dadur hela iha prizaun Cipinang-Jakarta, Indonézia.

“Husu ba Xanana, uluk kedas ha’u hakerek ba nia iha Cipinang, kestiona planu ne’e nia hatene,” Sekretáriu Jerál partidu FRETILIN ne’e ba jornalista sira iha edifísiu Prokuradória Jerál Repúblika (PJR), Sesta (06-11-2020), hafoin hato’o keixa ba PJR hasoru deputadu CNRT na’in 21.

Alkatiri subliña, sé tuir Plano da Paz ne’e mak Timor-Leste sei integra ba Indonézia. “Sé tuir planu ida ne’e, ohin loron ita ibu ho bapak hotu ona”, hakotu Sekretáriu Jerál partidu FRETILIN ne’e.

Antes ne’e, Marí Alkatiri, iha ninia pájina Facebook, iha loron 28, fulan Outobru 2020, husu eis Komandante em Xefe, Kay Rala Xanana Gusmão no eis Prezidente Repúblika, José Ramos Horta, atu aprezenta fali Plano da Paz, nu’udar estratéjia polítika, hodi solusiona problema ne’ebé akontese, durante invazaun Indonézia, no Plano da Paz ne’e presiza aprezenta no konta ba jerasaun foun, hodi hatene prosesu libertasaun nasionál ho loloos.

Ramos Horta-LUGU esplika Plano da Paz

Antes ne’e diplomata senior TL, José Ramos Horta, hatete, kona-ba “Plano da Paz” 1993/1994 ne’e nia parte prontu debate ho sé-sé de’it, tanba “Plano da Paz” ne’e la’os eskluzivu. Tanba nia rasik mak aprezenta Plano da Paz CNRM iha Parlamentu Europeia, iha fulan Abríl, tinan 1992 no iha Nova Iorque, iha fulan Maiu, tinan 1992. Alénde ne’e, Horta mós aprezenta Plano da Paz CNRM ne’e iha Noruega, iha fulan Novembru, tinan 1993.

“Ha’u prontu atu debate ho sé de’it, sé mak hakarak debate ho ha’u kona-bá asaun diplomátika, kona-bá Plano da Paz ida ne’e, ou Lariguto ou planu seluk, akadémikamente ita bele ko’alia. Tanba laiha Plano da Paz ida que ita bele hatete eskluzivu, tanba laiha dalan ida mak tanba ita lee Plano da Paz CNRM implementa duni, mas implementa iha tempu kompaktadu ne’e, ne’e mak akontese sein violénsia. Mesmu Prezidente Indonézia fiar hakarak rezolve, maibé sira la konsege kontrola situasaun iha Ambon, ho seluk tan. Portantu Plano da Paz ida que bele di’ak teb-tebes, tenke ezekuta tuir nia tempu, ita hanoin dehan la’o di’ak akadémikamente, mas dinámika iha rai-laran be ódiu, be kria violénsia”, Ramos Horta ba GMN iha Bebora-Díli, Segunda (13/10/2020), hodi hatán kona-ba Plano da Paz 1993/1994 ne’ebé Sekretáriu Jerál FRETILIN, Marí Alkatiri, liu husi nia konta facebook ezije Ramos Horta ho Xanana atu esplika ba públiku.

Horta dehan, iha luta ba libertasaun TL ne’e difísil tebes, tanba mobiliza ko’alia ho ema internasionál barak. Dala-ruma ema sira ne’e taka odamatan ba nia (Horta) hodi ko’alia kona-bá problema TL.

“Uluk nana’in iha enkontru Lariguto, Viqueque, Maun Bo’ot Xanana nu’udar Komandante Em Xefe FALINTIL, enkontru ho Purwanto, enkontru ne’ebé fasilitadu husi Gubernur Ir. Mario Viegas Carrascalão, aprezenta tiha ona FRETILIN ho FALINTIL nia kondisoens para solusaun ba problema Timor-Leste. Klaru pozisaun militár Indonézia nian, pozisaun Purwanto nian saida? Ne’e mak revizaun Comité Central da FRETILIN tomak, revizaun FALINTIL, garantia sira-nia seguransa, ne’e sira (Indonézia) nia proposta (maun Xanana ko’alia kona-bá ida ne’e foin la-lais ne’e). La signifika que ita tenta iha inisiativa diálogu ruma no iha kedas solusaun, iha kedas aseitasaun, klaru Indonézia joga ho nia forsa. Ita (Timor) tenta manan boa vontade International, hatudu ita-nia matenek, ita-nia sentidu Estadu e que ita nunka rejeita diálogu”, esplika diplomata senior ne’e.

Laureadu Nobel da Paz ne’e dehan, realidade Plano da Paz nian termina ho re­ferendu i termina iha akordu 5 de Maiu, tinan 1999, depois 30 de Agosto 1999, úniku ne’ebé la akontese Indonézia ba ita mak ida ne’e, laiha faze tranzisaun ida, sé posse faze tranzisaun ida iha pode-ser violénsia iha 1999 ne’e la akontese.

“Sira hotu-hotu dehan ba Maun Xanana adia referendu, Portugal mós momentu ne’e adia referendu, Bispu Ximenes Belo mós hatete, adia referendu, tanba violénsia, Maun Xanana tuku meza dehan, laiha adiamentu, ba oin, ba oin asina akordu 5 de Maio, ba oin halo referendu iha 30 de Agosto, tanba maun Xanana hatudu nia vizaun, nia matenek, Ingles hatete, window of opportunity ka janela oportunidade. Sé o lakon oportunidade ida ne’e, tanba o ezije kondisoens oi-oin, tenke iha seguransa 100%, ne’e ita lakon oportunidade referendu sei la akontese, ne’e mak akontese iha Sahara Osidentál nian, ne’e mak akontese kestaun Palestina nian to’o agora, ne’e hatudu maun Xanana nia matenek”, haktuir Horta.

“Plano da Paz, ita buka kriativu, ita buka manan espasu internasionál. Deklarasaun de prinsípiu la’ós Plano de Paz ida, ne’e deklarasaun de prinsípiu. Plano de Paz buat seluk ida, o buka ho pragmatisma, ho matenek oinsá o bele manan espasu, o bele manan apoiu no ita konsege duni” tenik.

Eis Prezidente Repúblika ne’e mós hatete, Plano da Paz, la signifika iha diálogu ida, iha kedas solusaun no aseitasaun.

Nune’e mós diplomata senior TL, José Luis Guterres (LUGU), subliña, Plano da Paz ne’e hanesan instrumentu traballu para buka apoiu ba Timor-Leste nia luta.

“Akordu 5 de Maio ita hotu apoia, balu iha dúvidas, maibé ho akordu ne’e mak ita iha referendu” hakotu LUGU.Ekipa GMN


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker