GMN TV Politika CNRT haree MEJD inkapasidade ezekuta OJE 2021 ■FRETILIN rekoñese lentu duni

CNRT haree MEJD inkapasidade ezekuta OJE 2021 ■FRETILIN rekoñese lentu duni

417 views

Deputadu Komisaun G ne’ebé trata Edukasaun Juventude No Desportu, Gabriel Soares, konsidera Ministériu Edukasaun Juventude no Desportu (MEJD), inkapasidade ezekuta Orsamentu Jeral Estadu (OJE) 2021, basá programa barak la ezekuta, no taxa ezekusaun ki’ik demais, maske tinan 2021 ne’e atu remata ona.

Deputadu bankada opozisaun CNRT ne’e observa, to’o tinan ne’e nia rohan, seidauk haree rezultadu fíziku ruma, liu-liu liga ho programa harii eskola no reabilitasaun eskola, ne’ebé aloka ona osan iha kategoria transferénsia públika.

“Ita tama ona fim do ano, ezekusaun Orsamentu hosi edukasaun ki’ik tebes, ida ne’e hatudu Ministériu Edukasaun nia kbi’it ba ezekusaun ne’e mukit teb-tebes, tanba iha kategoria rua ka tolu sira lakonsege ezekuta, hanesan iha kategoria kapital dezenvolvimentu, aloka USD 2.9 milloens, atu halo konstrusaun ba eskola sira, ne’e lakonsege ezekuta, nia persentajen ba ezekusaun ne’e 0%, depois iha fundu ida, tau iha kategoria transferensia públika, ne’e mós la sa’e, ne’e seidauk ezekuta, nia persentajen foin atinje 7%, ne’eduni ba iha MEJD, nia ezekusaun ne’e ki’ik. Ba fali iha SEJD mós nia ezekusaun ki’ik, nia fallansu ida tan mak, PN aprova ho montante ida USD 9 milloens liu, maibe iha nia implementasaun ho de’it USD 7 milloens liu, USD 2 milloens ne’e finansa dada fila fali atu lori fó ajudu fali ba estragu ne’ebé akontese iha 4 de Abril 2021, ita hatene katak fundu ida ba kalamidade ne’e PN aprova ketak. Maibe agora ida ne’e dada tan fali osan hosi SEJD nian, ne’e laloos ona, tanba orsamentu ne’e aprova por programa, ho kedas ida-idak nia sub-programa no atividade, agora dada tiha hanesan ne’e, lahatene implementasaun orsamentu ne’e tuir programa ka la’e? programa ida ne’ebé mak sobu, atividade ida ne’ebé mak sobu. Ida ne’e mak ami haree liuhosi ami-nia fiskalizasaun no audiénsia iha komisaun, mak ami detekta, SEJD rasik ezekuta 59%, ida ne’e hatudu katak kapasidade atu ezekuta ne’e mukit tebes. Eskola iha Timor laran tomak ida be grave liu, tuir ami nota, 204 eskola, ne’ebé ho kondisaun atu hadi’ak, maibe osan aloka tiha mós seidauk hadi’ak,”lamenta deputadu Gabriel ba JNDIÁRIO, Tersa (23/11/2021).

Ba preokupasaun ne’e, deputada FRETILIN, Gabriela Alves, argumenta, la’ós edukasaun de’it mak hasoru difikuldade ba ezekusaun, maibe ministériu hotu no ema hotu iha Timor-Leste no nasaun tomak hetan impedimentu oi-oin, tanba pandemia COVID-19 ne’e.

 “Haree ba progresu, liga ba planu Governu nian ba 2030, edukasaun tenke atinje ona tarjetu ne’ebé marka ona, maibe ho mudansa Governu, pandemia COVID-19 ne’ebé ita enfrenta, atu atinje ba planu 2030 ne’e sei lentu duni, ne’e ha’u rekoñese katak lentu. Liu-liu ita haree ba kondisaun eskola sira, ita haree ba formasaun de profesores sira, infraestrutura sira iha baze, ida ne’e lentu, seidauk hatan ba nessesidade povu nian, seidauk hatan ba saida mak povu hakarak, no seidauk hatan ba planu ne’ebé traxa ona, ha’u tenke rekoñese. Orsamentu tinan-tinan aloka USD 1 billaun resin iha OJE, maibe ezekusaun ne’e depende ba kapasidade ministeriu nian no mós depende ba situasaun sira,”dehan deputada FRETILIN ne’e.

To’o loron 23 fulan Novembru ne’e, Minstériu Edekusaun inklui Sekretáriu Estadu Juventude no Desportu nia ezekusaun orsamentu atinje 83%, hosi orsamentu USD 106,341,251.40 ne’ebé alokadu iha tinan 2021.

Ba tinan 2022, Ministériu Edukasaun Juventude no Desportu mós prevê tokon orsamentu USD 81, kompostu saláriu vensimentu USD 64,929, 539, bens no servisu USD 12.103.627, transferénsia públika USD 2,219,798, kapitál menór USD 124,200 no kapitál dezenvolvimentu prevee tan USD 2331, Say


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker